उद्घाटन खेलमा हेटौंडा–७ विजयी

३२ साउन, हेटौँडा । हेटौँडा–१ चैकिटोलमा रहेको सुन्दर वचत तथा ऋण सहकारी संस्था लिमिटेडको आयोजनामा बुधबारबाट हेटौँडामा सेभेन ए साइड फुटबल प्रतियोगिता शुरु भएको छ ।
संस्थाको नवौँ स्थापना दिवसको अवसरमा आयोजित सेभेन ए साइड फुटबलको उद्घाटन खेलमा हेटौँडा–७ को टिमले सुन्दर युवा संजाललाई ५–१ को गोल अन्तरले पराजित गरेको छ । कमानेको तर्फबाट संदिप पौडेलले ह्याट्रिक गरे भने उत्कृष्ट लामिछाने र राज लामाले १/१ गोल गरेका थिए । सुन्दर युवा संजालबाट उज्वल गौतमले १ गोल गरे । खेलको उद्घाटन डिभिजन सहकारी कार्यालय मकवानपुरका सहकारी अधिकृत तिलकराम पाख्रेलले गरेका थिए । 
सुन्दर वचत तथा ऋण सहकारी संस्थाका अध्यक्ष शम्भु नकर्मीको अध्यक्षतामा सम्पन्न भएको कार्यक्रममा मकवानपुर जिल्ला खेलकुद विकास समितिका उपाध्यक्ष दिपेन्द्र ढकाल, हेटौँडा–१ का वडा अध्यक्ष सविन न्यौपाने, हेटौँडा–४ का वडा अध्यक्ष नवीन सिग्देल, मकवानपुर जिल्ला फुटबल संघका अध्यक्ष राजेन्द्र श्रेष्ठ, सुन्दर सामुदायिक वन उपभोक्ता समितिका अध्यक्ष कमल लामा, ओम वृद्धाश्रमका अध्यक्ष बुद्धिप्रसाद पौडेल, चौकिटोल युवा संजालका अध्यक्ष जीवन छतकुली, चौकिटोल युवा क्लबका अध्यक्ष एशिस रिजाल लगायतको उपस्थिति रहेको थियो ।