हेटौंडामा निषेधाज्ञा उल्लंघन गर्ने एक दर्जन बढी पसलेलाई जरीवाना

१६ जेठ,हेटौंडा । जिल्ला प्रशासन कार्यालय मकवानपुरले जारी निषेधाज्ञाको उलंघन गरी पसल खोल्ने १६ जना पसलेलाई जारीवाना गरि छाडिएको छ। 

जारी निषेधाज्ञाको उलंघन गरी  पसल खोल्ने १६ जनालाई मकवानपुरका प्रजिअ र प्रहरी उपरीक्षक सहितको प्रहरी टोलीले  शनिबार र आइतबार बिहान नगरको विभिन्न स्थानमाबाट नियन्त्रणमा लिएको थियो।नियन्त्रणमा लिएका १६ जनालाई मकवानपुर प्रहरीले संक्रमण रोग ऐन अन्तर्गत मुद्दा चलाएको थियो। 

जिल्ला प्रशासन कार्यालय मकवानपुरले हेटौंडा-४ मा रहेको सिता किराना पसलका सञ्चालक, हेटौंडा-४ पशुपति मन्दिर चोकमा रहेको २ वटा तरकारी तथा फलफूल पसलका सञ्चालक,हेटौंडा-८ सडुन कोलोनिमा रहेको खाजाघरका सञ्चालक,हेटौंडा-५ पिप्लेमा रहेको चाउचाउ तथा बिस्कुट डिपोका सञ्चालक,हेटौंडा-२ कान्तिलोकपथमा रहेको रिजाल सिसा पसलका सञ्चालक,हेटौंडा-५ सानोपोखरा चोकमा रहेको ३ वटा मासु पसलका सञ्चालक,हेटौंडा-४ फरेष्टी क्याम्पसको गेट अगाडि रहेको मासु पसलका सञ्चालक,हेटौंडा-५ पिप्लेमा रहेको किराना पसलका सञ्चालक,हेटौंडा-५ पिप्लेमा रहेको टेलर्सका सञ्चालक,हेटौंडा-४ पारिजातपथमा रहेको मसला उद्योग र पसलका सञ्चालक,हेटौंडा-७ शान्तिटोलमा रहेको किराना पसलका सञ्चालक,हेटौंडा-५ सानोपोखरामा रहेको खाजा घरका सञ्चालक,हेटौंडा-४ थाहा चोकमा रहेको मासु पसलका सञ्चालक गरी १६ जना पसलेलाई  जनही २ हजार देखी ५ सम्म जरिवाना सहित कार्वाही गरिएको मकवानपुरका प्रहरी प्रवक्ता प्रहरी नायब उपरीक्षक जयश्वर रिमालले बताए।  

यस बिषयमा बुझदा मकवानपुरका प्रजिअ भरतमणी पाण्डेले निषेधाज्ञाको बारेमा सुचना गराउदा समेत अटेर गरेर पसल सञ्चालन गरी भिडभाड कायम गरेकोले नियन्त्रणमा लिई संक्रमण रोग ऐन २०२० बमोजिम जरिवान सहित कार्वाही गरिएको जानकारी दिएका छन।  

"म सहित प्रहरी उपरीक्षक तथा प्रहरी टोलीले अनुगमनका क्रममा हेटौंडाको विभिन्न स्थानबाट अटेर गरी पसल खोलेको अवस्थामा १६ जनालाई नियन्त्रणमा लिएर कार्वाही गरेका हौं,एक पटकलाई जरिवान तिराएका छौ,फेरी पनि अटेरगरी पसल खोले जेल हाल्छौं-प्रजिअ पाण्डेले भने। 

जिल्ला प्रशासन कार्यालय र जिल्ला प्रहरी कार्यालयले हेटौंडा सहित मकवानपुरका निषेधाज्ञा उल्लंघन बढेको भन्दै कडिकडाउ गरेको छ।हेटौंडा बजारको चार किल्ला बाहिर बिहान ३ घण्टा खाद्यान्न,डेरी पसल खोल्न दिइएपनि हेटौंडा बजारमा औषधि पसल,अक्सिजन डिपो र मल तथा बिउ बिजन पसल मात्र खोल्न दिइएको छ।