गोली लागेर एकको मृत्यु, ४ जना पक्राउ

२० जेठ, मोरङ । मोरङको केराबारी गाँउपालिकामा जंगलमा शिकार खेल्ने क्रममा गोली लागेर एकजनाको मृत्यु भएको छ । 
शिकार खेल्ने क्रममा बैशाख ८ गते ३२ वर्षीय हस्तकुमार राईको गोली लागि मृत्यु भएको थियो । हत्या घटनामा संलग्न भएको आरोपमा ४ जना हतियारसहित पक्राउ परेका छन् ।
जिल्ला प्रहरी कार्यालय मोरङका अनुसार गाँउपालिकास्थित बाँसघारी खोप सहकारी राष्ट्रिय वनमा गाउँपालिका ३ का स्थानीय राईसँगै शिकार खेल्न जाने क्रममा २६ वर्षीय रुविन लिम्बु, ३७ वर्षीय गजेन्द्रबहादुर राईसहित १० जनाको समूह रहेको प्रहरीले जनाएको छ।
रुविन र गजेन्द्रलाई घटना भएको भोलिपल्ट बैशाख ९ गते नै प्रहरीले पक्राउ गरेपनि अन्य भने फरार रहेका थिए। फरार रहेकामध्ये प्रहरीले केराबारी गाँउपालिका ३ का ४४ वर्षीय डिकबहादुर राई, ३६ वर्षीय बुद्धविर लिम्बु, १९ वर्षीय रामप्रसाद राई र लेटाङ नगरपालिका १ का १९ वर्षीय विपन लिम्बुलाई प्रहरीले जेष्ठ १९ गते बुधबार पक्राउ गरेको हो ।
प्रहरीले उनीहरुको साथबाट शिकार खेल्दा प्रयोग गरिएको चार थान भरुवा बन्दुकसमेत बरामद गरेको छ।मोरङ प्रहरीका प्रवक्ता मानबहादुर राईका अनुसार चारजनालई पक्राउ गरेसँगै उनीहरुले बाँसघारी खोप सरकारी राष्ट्रिय वनमा सखुवाको रुखको चेपबाट २ वटा, सो क्षेत्रमा ढुंगामाथि पातले छोपेको अवस्थामा एउटा र बाँकी एउटा बन्दुक भने लेटाङ नगरपालिकामा पर्ने जङ्गलको ओडारमा लुकाइ राखेको अवस्थामा गरी ४ थान भरुवा बन्दुक फेला परेको हो।
बैशाख ८ गते शिकार खेल्दै गर्दा राती करिब ९ बजे गजेन्द्र राईले प्रहार गरेको भरुवा बन्दुकको गोली हस्तलाई लागेको अनुसन्धानका क्रममा खुलेको मोरङ प्रहरीले जनाएको छ।
राईले प्रहार गरेको गोली हस्तको कुममा हुँदै शरीरमा लागेको थियो। उनको घटनास्थलमै मृत्यु भएको थियो। पक्राउ परेका उपर प्रहरीले ज्यान सम्बन्धी र हातहतियार खरखजाना कसुरमा अनुसन्धान अघि बढाएको छ । (देशसंचारबाट)