प्रणामी युवा परिषदद्वारा सम्मान

४ भदौं, हेटौँडा । श्रीकृष्ण प्रणामी युवा परिषद मकवानपुरले हाजिरीजवाफ प्रतियोगिता, नागरिक अभिनन्दन र उत्कृष्ट विद्यार्थी सम्मान कार्यक्रम सम्पन्न गरेको छ ।

कृष्ण प्रणामी मन्दिर हेटौँडा–४ मा शनिबार भएको जिल्लास्तरीय अन्तरमावि हाजिरीजवाफ प्रतियोगितामा रेडरोज इङ्लीस स्कूल पहिलो, जिएस निकेतन दोस्रो र राजदेवी मावि तेस्रो भएका छन् । १३ विद्यालयको सहभागिता रहेको प्रतियोगितामा पहिलो, दोस्रो र तेस्रो हुनेले शिल्ड तथा प्रमाणपत्र प्राप्त गरेका छन् । 

कार्यक्रममा एसईई परीक्षामा उत्कृष्ट अंक ल्याउने प्रणामी समुदायका विद्यार्थीलाई सम्मान गरिएको थियो । छात्रतर्फ रेडरोजका राजकिरण सापकोटा र छात्रातर्फ रेडरोजकै अनिसा गजुरेलाई सम्मान गरिएको थियो । त्यसैगरी, नागरिक अभिनन्दनतर्फ धार्मिक व्यक्तित्व हेटौँडा–१८ हर्नामाडिका कृष्णप्रसादबजगाई र सामाजिक व्यक्तित्व मकवानपुर उद्योग बाणिज्य संघका अध्यक्ष राजकुमार न्यौपानेलाई सम्मान गरिएको कार्यक्रम संयोजक जयप्रकाश घिमिरेले बताए ।

युवा परिषदका केन्द्रीय उपाध्यक्ष प्रमोद वाग्लेको प्रमुख आतिथ्यता एवं जिल्ला अध्यक्ष विष्णु वाग्लेको अध्यक्षतमा भएको कार्यक्रममा श्रीकृष्ण प्रणामी सेवा समितिका जिल्ला अध्यक्ष रामकृष्ण तिवारी, युवा परिषदका पूर्व केन्द्रीय अध्यक्ष रामप्रसाद शर्मा, नारायणी यातायात व्यवसायी संघका अध्यक्ष बद्रीप्रसाद चौलागाई लगायतको सहभागिता रहेको थियो ।