कमल थापालाई झड्का, के गर्लान् उनले ?

६ भदौं, काठमाण्डौं । सनाखतका लागि केन्द्रीय सदस्यलाई रोक्ने उद्देश्यले ३ दिन हेटौँडामा केन्द्रीय सदस्य राखेर बैठक गरेका राप्रपा अध्यक्ष कमल थापालाई झड्का लागेको छ ।
भदौं ४ गते निर्वाचन आयोगले राप्रपा प्रजातान्त्रिक गठनका लागि सनाखत गर्ने समय घर्काउँदै केन्द्रीय कार्यसमिति बैठक राखेका थापा सनाखतका लागि थापा नगएपछि केही उत्साहित थिए । ‘४० पुग्दै नपुग्ने निश्चित छ, तर रित विपरितको निवेदन आयोगले दर्ता ग¥यो’–आइतबार अपरान्ह हेटौँडामा केन्द्रीय कार्यसमिति बैठकपछिको पत्रकार सम्मलनमा भन्दै थिए । तर मनमा आशंका भने छदैं थियो, उनले थपे–‘तर अदालतले के गर्छ थाहा छैन, यहाँ जे पनि हुनसक्छ ।’ उनको आशंका अनुसार नै सर्वोच्च अदालतले आदेश गरेपछि भने उनलाई झड्का लाग्यो ।
अदालतले सोमबार राप्रपा प्रजातान्त्रिकको माग बमोजिम पुनः निर्वाचन अयोगमा केन्द्रीय सदस्य तथा सांसदको हस्ताक्षर सनाखत गराउन नपर्ने आदेश दिएको छ । निर्वाचन आयोगले पुनः हस्ताक्षर सनाखत गराउन बोलाएपछि असन्तुष्टि जनाउँदै  राणाले शुक्रबार सर्वोच्च अदालत मुद्दा दायर गरेका थिए । न्यायाधीश तेजबहादुर केसीको एकल इजलासले राणाको माग बमोजिम पुनः निर्वाचन आयोगमा सांसद तथा केन्द्रीय सदस्यको सनाखत नगराउन आदेश दिएको थियो । 
राणाले गत साउन २२ गते निर्वाचन आयोगका ५६ केन्द्रीय सदस्यसहित ६४ जनाको हस्ताक्षर बुझाएको तर आयोगले पुनः सबै केन्द्रीय सदस्य र सांसदको  सनाखत गर्न बोलाएपछि उनी बाँकी संख्याको मात्रै सनाखत गराइनुपर्ने माग गर्दै  शुक्रबार अदालत पुगेका थिए । अब उनले सनाखत गर्न बाँकीको मात्रै सनाखत गरे पुग्ने भएको छ ।
आदेशबारे कमल थापा नेतृत्वको राप्रपाले अहिलेसम्म कुनै प्रतिक्रिया दिएको छैन । कुनै पनि राजनीतिक घटनाको प्रतिक्रिया ट्विटरमार्फत दिने थापाले अहिलेसम्म कुनै प्रतिक्रिया नदिएका हुन् । उनले नेता राजेन्द्र लिंदेलको ट्विट भने रिट्विट गरेका छन् । लिंदेलले ट्विटमा भनिएको छ ‘न्यायको अन्तिम आधार सर्वोच्च पैसा र विदेशी प्रभावमा चल्यो,न्याय मरयो भने ढिलो चांडो देशले विद्रोह व्यहोर्न पर्ने हुन्छ ।’ अब के गर्लान थापाले भन्ने चासो सर्वत्र छ । 
राप्रपा सहप्रवक्ता मोहन श्रेष्ठले फैसलाबारे अध्ययन भइरहेको भन्दै अहिले कुनै प्रतिक्रिया नदिने बताए । केन्द्रीय सदस्य हेटौँडामा बैठक डाकेपछि राणा पक्षले आफ्नो पक्षका केन्द्रीय सदस्य अपहरण गरेको समेत आरोप लगाएको थियो । थापाले भने यसलाई हास्यास्पद भनका थिए ।  अदालतको निर्णय पछि राप्रपा र राप्रपा प्रजातान्त्रिकको दुबै रणनीति के हुन्छ भन्ने चासो बढेको छ ।