राज्यमन्त्रीमा परिनन् डिना

६ भदौं, हेटौँडा । शेरबहादुर देउवाको मन्त्रीमण्डलमा पर्ने चर्चामा रहेकी नेपाली कांग्रेसकी नेतृ महालक्ष्मी डिना उपाध्याय राज्यमन्त्रीमा पनि परिनन् । कांग्रेसकी केन्द्रीय सदस्य र यसअघि पनि राज्यमन्त्री भईसकेकी उपाध्याय देउवा प्यानलकै हुन् । 
देउवा प्रधानमन्त्री भएसंगै मन्त्री बन्ने चर्चामा रहेपनि विस्तारमा पर्न सकेकी थिईनन् । सोमबार कांग्रेस पार्टी कार्यालय मकवानपुरमा जम्मा भएका कांग्रेसजन पनि उनी राज्यमन्त्री हुने दावि गरिरहेका थिए । प्रभावशाली महिला नेतृ उनलाई राज्यमन्त्रीमा भएपनि ‘एड्जस्ट’ गर्ने चर्चा चलेको थियो । संसदको विभिन्न समितिमा सक्रिय उनी मंगलबार विस्तार भएको मन्त्रीमण्डमा समेत नअटेपछि यो पटक मन्त्रीमण्डलमा मकवानपुरको उपस्थिति शुन्य हुने भएको छ । 
यसअघि माओवादी केन्द्रका सांसद रामनारायण विडारी मन्त्री हुने भनिएकोमा उनी पनि मन्त्रीमण्डलमा अटेनन् । उनलाई सर्वोच्चले बरिष्ठ अधिवक्ताको उपाधी दिएको छ । यसअघि मकवानपुरबाट कांग्रेस जिल्ला सभापति समेत रहेका मकवानपुरका क्षेत्र नम्बर १ का सांसद इन्द्रबहादुर बानियाँ संस्कृति, पर्यटन तथा नागरिक उड्डयन राज्यमन्त्री र गृह राज्यमन्त्री भएका थिए । 
मंगलबार विस्तार हुने मन्त्रीमण्डलका राज्यमन्त्रीहरुमा कांग्रेसकातर्फबाट शेषनाथ अधिकारी, सीता गुरुङ, उदयशम्शेर राणा, नरबहादुर चन्द, तप्तबहादुर बिष्ट, अब्दुल रजाक, डिल्ली चौधरी, दिलमान पाख्रिन, चम्पादेवी खड्का, सरिता प्रसाईँ, अम्मर सिंह पुन र तेजुलाल चौधरी छन् ।
त्यस्तै विजय गच्छदार नेतृत्वको नेपाल लोकतान्त्रिक फोरमबाट जनकराज चौधरी, सुमित्रा थरुनी र योशादा लामा सरकारमा सहभागी हुने काँग्रेस नेता विमलेन्द्र निधिले जानकारी दिए । देउवा गत जेठ २४ गते प्रधानमन्त्रीमा निर्वाचित भएका थिए ।