डोजरको बकेटले हिर्काएर वडाध्यक्ष श्रेष्ठको हत्या

१२ असार, सर्लाही । सर्लाहीको ईश्वरपुरमा डोजरको बकेटले हिर्काएर वडाध्यक्षको हत्या भएको छ । ईश्वरपुर–३ भक्तिपुरका वडाध्यक्ष करिब ५५ वर्षीय सूर्यकुमार श्रेष्ठको शुक्रबार राति हत्या भएको प्रहरीले जनाएको हो ।
पोखरीको निरीक्षण गर्न जाँदा विवाद बढेपछि डोजर चालक र केही व्यक्तिले वडाध्यक्षको हत्या गरेका जिल्ला प्रहरी कार्यालय सर्लाहीले जनाएको छ ।
ईश्वरपुर–३ को मुखलाल बाँधमा पोखरी विस्तारको अनुगमन गर्न जाँदा जेभिसीको बकेटले हिर्काएर वडाध्यक्षको हत्या गरिएको प्रहरीको भनाई छ । शुक्रबार साँझ जेसीभीका ठेकेदार प्रेम दाहाल र वडा अध्यक्ष श्रेष्ठ पोखरी निरीक्षण गर्न बाँध स्थलमा गएकोमा नजिकैको पसलमा खाजा खाने क्रममा जेसिभिका चालक हर्कबहादुर तामाङ र वडाध्यक्षबीच बिबाद भएको थियो । 
खाजा खाएपछि पोखरी बिस्तार भइरहेको ठाउँमा गएका श्रेष्ठलाई जेसिभि चालकले वडाध्यक्ष श्रेष्ठको टाउको र छातीमा बकेटले प्रहार गरेरको र वडा अध्यक्षको शव पुरेर चालक भागेको ईश्वरपुर नगरपालिकाका मेयर मनोज देवकोटाले जानकारी दिए । श्रेष्ठलाई शव प्रहरीले निकालेर राति नै जिल्ला अस्पताल मलङ्गवा पुर्याएको छ । 
जेसिभि चालक र धनीलाई पक्राउ गरी अनुसन्धान अघि बढाएको सर्लाहीका प्रहरी उपरीक्षक सन्तोष सिंह राठौरले जानकारी दिए ।