हेटौंडा-६ शान्तिटोलमा पुस्तकालय स्थापना

१२ असार, हेटौंडा । हेटौंडा–६, शान्तिटोलमा शान्ति पुस्तकालय स्थापना गरिएको छ । शनिबार बिहान पुस्तकालय उद्घाटन गरिएको हो । 
शान्तिटोल टोद विकास संस्थाका अध्यक्ष एवं टोल विकास संस्था हेटौंडा ६ नम्बर वडा समन्वय समितिका अध्यक्ष केशव धितालको अध्यक्षता र हेटौंडा-६ का वडा अध्यक्ष अर्जुनप्रसाद चौलागाईको प्रमुख आतिथ्यमा पुस्तकालय उद्घाटन गरिएको हो । पुस्तकालय उद्घाटन कार्यक्रममा वडा अध्यक्ष चौलागाईले पुस्तकालयका लागि पुस्तक खरिद गर्न आगामी आर्थिक वर्ष २०७८/७९ मा एक लाख रुपैयाँ उपलब्ध गराउने प्रतिबद्धता व्यक्त गरे ।
पुस्तकालयलाई पुस्तकालय अभियान समूहले मकवानपुरले ५० हजार रुपैयाँ बराबरको पुस्तक सहयोग गरेको छ । 
कार्यक्रममा नेपाल पत्रकार महासंघ बागमती प्रदेशका संस्थापक अध्यक्ष प्रताप विष्ट, वंशगोपाल माविका प्रधानाध्यापक रमेशप्रसाद लामिछाने, स्थानीय समाजसेवी बद्रिबहादुर पाठक, पुस्तकालय अभियान समूहका सदस्य सुशील राज गिरीफ टोल विकास संस्था हेटौंडा उपमहानगर समन्वय समितिका अध्यक्ष ध्रुब अधिकारी लगायतले मन्तव्य व्यक्त गरेका थिए । 
शान्ति पुस्तकालय स्थापनाका लागि प्रताप विष्ट, विश्वराज सिग्देल, बुद्ध लामा, किरण अधिकारी, केदार आचार्य, रोशन खनाल, रविन श्रेष्ठ, प्रकाश गौतम, चिरञ्जीवी भट्टराई र हरिकुमार शर्माले जनही ५ हजारका दरले रकम संकलन गरी ५० हजार रुपैयाँ बराबरको पुस्तक पुस्तकालयलाई सहयोग गरेका थिए । कार्यक्रममा नेपाल पुस्तकालय संघका केन्द्रीय समिति सदस्य गोविन्द चौलागाई, हेटौंडा–४, कमलडाँडास्थित रोशनी पुस्तकालयका अध्यक्ष संगीत श्रेष्ठ, हेटौंडा–७, नागस्वतीस्थित समृद्ध पुस्तकालयका अध्यक्ष युवराज गौतम, सचेत नागरिक युवा समूहका अध्यक्ष शिवनारायण श्रेष्ठ लगायतको सहभागिता रहेको थियो ।