गुम्बा विहार संघर्ष समितिद्वारा आन्दोलन घोषणा

१० भदौं, हेटौँडा । भुकम्प प्रभावित गुम्बा विहार पुर्ननिर्माण संघर्ष समिति मकवानपुरले राज्यले आफुहरुलाई दुःख दिएको भन्दै संघर्षको थप कार्यक्रम सार्वजनिक गरेको छ । 
समितिले शनिबार हेटौँडामा पत्रकार सम्मेलन गरी संघर्षको कार्यक्रमबारे जानकारी दिएको हो । आफुहरुले राखेको माग पुरा नभएको भन्दै समितिले भदौं १५ गते मकवानपुरका प्रमुख जिल्ला अधिकारीलाई ज्ञापनपत्र बुझाउने समितिका अध्यक्ष निरु थिङले बताए । आव ०७३/०७४ मा गुम्बा पुर्ननिर्माणका लागि गुम्बा विहार विकास समितिले बनाएको कार्यविधि अनुसार सम्पूर्ण प्रक्रिया पुरा गरी निर्माणको अन्तिम अवस्थामा कार्यविधि परिवर्तन गरेको भन्दै समितिले आपत्ति जनाएको छ । 
पुरानो कार्यविधि अनुसार गुम्बाको नक्सा बनाउन मकवानपुरमा ३९ लाख ५० हजार रुपैँया समेत खर्च भएको समितिको भनाई छ । भुकम्प पुर्ननिर्माण प्राधिकरणले बनाएको नयाँ कार्यविधि खारेज गर्नुपर्ने, छुट भएका गुम्बा विहारलाई समावेश गर्नुपर्ने, कार्यविधिमा मर्ति, आर्ट र थान्कालाई पनि समावेश गर्नुपर्ने लगायतका माग गरेको सचिव सुवास लामाले बताए । 
मकवानपुरका ७९ वटा गुम्बालाई ५१ लाख रुपैँयादेखि १ करोड रुपैँया सम्म बजेट विनियोजन भएकोमा आव ०७३/७४ मा पहिलो किस्ता बापतको २७ करोड २० लाख रुपैँया फ्रिज भएको छ ।