मौलिक दुर्वाष्टमी अर्थात गौरा पर्व मनाइँदै

१३ भदौ, हेटौँडा । भाद्र शुक्ल अष्टमीका दिनमा मनाइने गौरा पर्व आज (मंगलबार)सुदूरपश्चिम र मध्यपश्चिमवासीले मनाउँदैछन् । आजको दिन उमामहेश्वरसहित दुबोको पूजा गरेर यस क्षेत्रका मानिसहरुले विशेष धुमधामका साथ गौरा पर्व माउँदैछन् । 
सत्य युगमा हिमालय पुत्री पार्वतीले महादेव स्वामी पाऊँ भनी भाद्र महिनामा जल, जङ्गल, जमिन र जनावरको डर नमानी कठोर तपस्या गरेपछि मनोकामना पूरा भएको धार्मिक विश्वास गरिन्छ । 
गौरा पूजा गर्न पाँच वनस्पति कुश, काँस, सामा (सौँ), तीतेपाती र अपामाग वा तिलको बिरुवा राखेर देवीको आकार बनाउने गरिन्छ । यसरी बनाइएको देवीलाई भाद्र शुक्ल अष्टमीका दिन गाउँको सफा घरमा भित्रयाएर ब्रतालुले निराहार बसी पूजा गर्ने परम्परा छ ।
देवीलाई गाउँका नायकले भित्र्याउनुपर्ने चलन छ । यसरी भित्रयाउँदा अरु कसैले पनि हेर्नु नहुने विश्वास गरिन्छ । दुई÷तीन दिन पूजा गरिसकेपछि मङ्गलबार र शनिबार नपारी देवीलाई नदी, कुवा, पोखरी वा जलाशयमा लगी सेलाइन्छ । 
देशका अन्य भागमा तिज मनाएजस्तै पश्चिममा यो पर्व विशेष गरी नारीहरूले मनाउने गरेका छन् । भाद्र शुक्ल अष्टमी अगाडि नै अगस्ति ऋषिको उदय भएको अवस्थामा भने भाद्र कृष्ण अष्टमी अर्थात् श्रीकृष्ण जन्माष्टमीकै दिनमा गौरा पर्व मनाउनु पर्ने शास्त्रीय विधान रहेको नेपाल पञ्चाङ्ग निर्णायक समितिका अध्यक्ष एवम् धर्मशास्त्रविद् प्राडा रामचन्द्रले बताउनुभयो । यस पर्वको उपलक्ष्यमा सरकारले आज राष्ट्रिय बिदा दिएको छ ।