अपडेट: हेटौंडाको बुद्धचोकमा खुकुरी हान्ने र घाइतेको पहिचान खुल्यो

२७ साउन, हेटौंडा । हेटौंडाको मुटु बुद्धचोकमा खुकुरी हानाहान गर्ने र खुकुरी प्रहारबाट घाइते हुनेको पहिचान खुलेको छ । खुकुरी प्रहरबाट हेटौंडा–१ चौकीटोलका २६ बर्षीय प्रशान्त नगरकोटी घाईते भएको मकवानपुर प्रहरी प्रवक्ता प्रहरी नायब उपरीक्षक जयश्वर रिमालले जानकारी दिए । "आँखा तरेको भन्दै लामा दाजुभाइले नगरकोटी माथी खुकुरी प्रहार गरेको प्रारम्भिक अनुसन्धानबाट खुलेको र वहाँहरूको पहिलै झगडा भएर यस अघि नै जिप्रका मकवानपुरमा मिलापत्र भएको रहेछ"- प्रहरी नायब उपरीक्षक रिमालले भने। 

नगरकोटलाई हेटौंडा–१० बसपार्क बस्ने २१ बर्षीय सौरभ लामा र उनका भाई मिलेर खुकुरी प्रहार गरेका थिए । सौरभ लामालाई प्रहरीले पक्राउ गरिसकेको, लामा पनि घाइते रहेकोले प्रहरी निगरानीमा उपचार भइरहेको र उनका भाइ भने फरार रहेको डिएसपी रिमालले बताए ।  
घाइतेको अवस्था सामान्य रहेको र हेटौंडा अस्पतालमा उपचार भइरहेको जनाइएको छ । खुकुरी प्रहार गर्ने लामा मकवानपुर प्रहरीको नियन्त्रणमा रहेको र घटनाको आवश्यक अनुसन्धान भइरहेको डिएसपी रिमालले बताए । 
लामा दाजुभाइ र नगरकोटी दुवैविच सामान्य भनाभन हुँदै गर्दा खुकुरी प्रहार भएको थियो । बुद्धचोकमा डयुटीमा रहेका प्रहरीले दुबैलाई नियन्त्रणमा लिएका छन् । प्रहरीले बल प्रयोग गरेर युवाको हातबाट खुकुरी खोसेका थिए ।