मानव सेवा आश्रमको प्रगति सार्वजनिक

२७ भदौ, हेटौँडा । सडकमा अलपत्र अवस्थामा रहेकाहरुलाई उद्धार गरी आश्रय दिंदै आएको मानव सेवा आश्रम हेटौँडाले मंगलबार आफ्नो बार्षिक प्रगतिबारे जानकारी गराएको छ । आश्रमले आर्थिक बर्ष ०७३/७४ को आर्थिक प्रगति एवं गतिविधिबारे पत्रकार सम्मेलनमार्फत जानकारी गराएको हो । 

कार्यक्रममा आश्रमका अध्यक्ष रामजी अधिकारीले आश्रममा हाल ६० महिला र ४० पुरुष गरी एक सय जनाले आश्रय लिईरहेको जानकारी दिए । उनका अनुसार आश्रमले एक बर्षमा एक सय ५ जनालाई उद्धार, २१ जनालाई पारिवारिक पुर्नमिलन गराएको छ भने आश्रममा आश्रित १७ जनाको मृत्यु भएको छ । आश्रमले सकारात्मक काम गरे बापत विभिन्न राष्ट्रिय पुरस्कार पाउनुका साथै भवन निर्माणका लागि मह जात्रा गरी ५० लाख रुपैँया आर्थिक संकलन गरेको अध्यक्ष अधिकारीले बताए । 

कार्यक्रममा आश्रमका लेखापाल चक्रप्रसाद जोशीले आव ०७३/०७४ मा आय एक करोड ६८ लाख १६ हजार ३ सय ३६ रुपैँया र व्यय १ करोड ६९ लाख ३७ हजार ९ सय ६९ रुपैंया रहेको जानकारी दिए । कार्यक्रममा आश्रमको भवन निर्माण उपभोक्ता समितिका संयोजक ताराप्रसाद लामिछानेले भवन निर्माणतर्फ हिसाव सार्वजनिक गर्दै आय ८८ लाख १२ हजार २ सय ३३, व्यय ८८ लाख ५८ हजार ५ सय ५७, पेश्की तथा उठ्न बाँकी १ लाख ३ हजार ५ सय र बैंक मौज्दात ४ लाख ५७ हजार ५ सय ४ रुपैँया रहेको जानकारी दिएका थिए । 

कार्यक्रममा आश्रमका अभिभावक प्रकाश पौडेल, संयोजक होमनाथ तिमल्सिना लगायतले मन्तव्य व्यक्त गरेका थिए ।