उपाधीका लागि आर्मी र पुलिस भिड्ने

२ असोज, हेटौँडा । केशवलाल श्रेष्ठ स्मृति दोस्रो पुरुष राष्ट्रिय भलिबल प्रतियोगिताको उपाधी होडमा नेपाल आर्मी क्लब र नेपाल पुलिस क्लब आमनेसामने हुने भएका छन् । 
मंगलबार हेटौंडा–१९, बस्तीपुरस्थित निर्मल बहुमुखी क्याम्पसको खेल मैदानमा उपाधीका लागि नेपाल आर्मी क्लब र नेपाल पुलिस क्लबको टिमबीच फाइनल खेल हुनेछ । सोमबार भएको सेमीफाइनल खेलमा सशस्त्र प्रहरी बलको एपीएफ क्लबलाई  पराजित गर्दै नेपाल आर्मी क्लब फाइनल प्रवेश गरेको हो भने आयोजक मकवानपुरलाई पराजित गर्दै नेपाल पुलिस क्लब फाइनल प्रवेश गरेको हो । सेमीफाइनलमा नेपाल आर्मी क्लबले सशस्त्र प्रहरी बलको एपीएफ क्लबलाई २६–२४, २५–१८ र २५–१६ को सोझो सेटमा पराजित गरेको हो । 
यस्तै दोस्रो सेमीफाइनल खेलमा नेपाल पुलिस क्लबले आयोजक मकवानपुरलाई २५–२०, २५–१५ र २५–१६ को सोझो सेटमा पराजित गर्यो । प्रतियोगिताको उपाधी विजेताले २ लाख नगदसहित शिल्ड, मेडल र प्रमाणपत्र प्राप्त गर्नेछ भने उपविजेताले १ लाख रुपैया नगदसहित शिल्ड, मेडल तथा प्रमाणपत्र प्राप्त गर्नेछ । तेस्रो स्थानका लागि आयोजक मकवानपुर र सशस्त्र प्रहरी बलको एपीएफ क्लबबीच खेल हुनेछ । तेस्रो हुने टिमले नगद ५० हजार रुपैयासहित शिल्ड, मेडल तथा प्रमाणपत्र प्राप्त गर्नेछ भने चौथो हुने टिमले सान्त्वना स्वरुप २५ हजार रुपैया प्रदान गरिनेछ । 
प्रतियोगितामा उत्कृष्ट विधागत पुरस्कार समेत प्रदान गरिनेछ । ८ टिमको सहभागिता रहेको प्रतियोगिता केशवलाल श्रेष्ठ स्मृति केन्द्रीय प्रतिष्ठान मकवानपुर र युवा तथा खेलकुद समन्वय समिति हेटौंडा–१९, बस्तीपुरको संयुक्त आयोजनामा भएको हो ।