मकवानपुरमा कोभिडविरूद्धको खोप अभियान तिब्र बनाइने

२१ पुस, हेटौंडा । जिल्ला खोप समन्वय समितिले मकवानपुरमा कोभिडबिरुद्धको खोप लगाउने अभियानलाई तिब्र रुपमा अगाडि बढाउने निर्णय गरेको छ । जिल्ला प्रशासन कार्यलय मकवानपुरमा बसेको बैठकले यस्तो निर्णय गरेको हो ।
कोरोना संक्रमणको दर फेरि बढ्न थालेपछि खोप लगाउन बाँकी रहेका जिल्लाबासीहरुमा खोप अभियान तिब्र बनाउने निर्णय गरेको छ । जिल्लामा ५३ प्रतिशतले मात्र कोभिडबिरुद्धको खोप लगाएको तथ्यांक रहेकाले बाँकी रहेकाहरुलाई पनि अनिवार्य खोप लगाउन आग्रह गर्दै खोप अभियान महिना संचालन गर्ने निर्णय भएको मकवानपुरका प्रमुख जिल्ला अधिकारी भरतमणि पाण्डेले जानकारी दिए ।
जिल्लाका मनहरी गाँउपालिका, राक्सिराङ गाउँपालिका, कैलाश गाउँपालिका र बकैया गाउँपालिकामा अधिकांशले खोप नलगाएकोले ति गाउँपालिकाहरुमा बिशेषगरी खोप अभियान संचालन गर्ने बताईएको छ ।
बैठकले विकट क्षेत्रमा रहेका स्थानीय तहहरुमा अपेक्षाकृत खोप कार्यक्रम सफल नभइरहेको सन्दर्भमा ती गाउँपालिकामा विशेष खोप अभियान सञ्चालन गर्ने, स्थानीय तहका विभिन्न सरकारी कार्यालय, विद्यालय, मानिसहरुको भिडभाड हुने स्थानहरुमा हेल्थ डेस्क स्थापना गर्ने तथा खोेप नलगाएका स्थानीयलाई खोप लगाउन उत्प्रेरित गर्ने लगायतका निर्णय बैठकले गरेको प्रमुख जिल्ला अधिकारी पाण्डेले जानकारी दिए ।