सवारी संचालनमा रोक लगाएकोमा संघको आपत्ति

२ भदौ, हेटौँडा । जिल्ला प्रशासन कार्यालय र जिल्ला प्रहरी कार्यालय मकवानपुरले मकवानपुरका ग्रामिण भेगमा चल्ने सवारी संचालनमा रोक लगाएकोमा नारायणी यातायात व्यवसायी संघले आपत्ति जनाएको छ । 
रुट इजाजत नभएका सडकमा यात्रुवाहक सवारी संचालनमा रोक लगाउने सरकारको निर्णय कार्यान्वयनका लागि विहिबारबाट ग्रामिण भेगमा चल्ने सवारी संचालनमा रोक लगाएकोमा संघले आपत्ति जनाएको हो । संघले पत्रकार सम्मेलन गरी कुनै एक घटनालाई आधार बनाई व्यवसायीले गरेको लगानीमाथि खेलवाड र नागरिकले उपयोग गरिरहेको सुविधालाई हचुवा प्रकारले बन्द गरेको जनाएको छ । सर्वपक्षिय छलफलका आधारमा भाडा तय गर्ने र सवारी संचालन गर्ने सहमति अनुसार ग्रामिण भेगमा सवारी संचालन गरेको भन्दै संघका अध्यक्ष बद्रीप्रसाद चौलागाईले सवारी संचालनमा एक्कासी रोक लगाउँदा व्यवसायी र यात्रु दुबैलाई असुविधा पुगेको बताए । 
रोक लगाउने निर्णयबारे प्रशासनले यथाशिघ्र पुर्नविचार गर्ने उनको विश्वास छ । २०७२ असार २३ र २०७३ बैशाख ८ गते जिल्ला यातायात व्यवस्थापन समितिमार्फत रुट परमिटका लागि सिफारिस गरेपनि सरकारले वेवास्ता गरेको संघको आरोप छ ।
जिल्लाका १८ ग्रामिण रुटका १ सय ८५ सवारी विहिबारबाट ठप्प हुँदा ग्रामिण भेगका स्थानीयलाई सास्ती भएको छ । चाडपर्वको समयमा विना विकल्प एक्कासी सवारी बन्द हुँदा समस्या परेको उनीहरुको भनाई छ ।