हेटौंडा कमानेमा लागेको आगो १८ घण्टापछि नियन्त्रणमा

१९ फागुन,हेटौंडा। बुधबार राति ११ बजेदेखि हेटौंडा-८ कमानेमा रहेको भुस गोदाममा लागेको आगो करिब १८ घण्टापछि नियन्त्रणमा आएको छ। 
बुधबार राति हेटौंडा-८ विकास मार्गमा रहेको टिका प्रसाद कँडेलले सञ्चालन गरेको भुस गोदाममा लागेको आगो बिहीबार साँझ ५ बजे नियन्त्रणमा आएको मकवानपुर प्रहरीले जनाएको छ। आगो नियन्त्रणका लागि वीरगन्ज र भरतपुर महानगरपालिकाको दमकल,जीतपुर सिमरा र हेटौंडा उपमहानगरपालिका,खैरहनी नगरपालिका र नेपाल आयल निगम अमलेखगन्जको दमकल,स्थानीय,नेपाली सेना,सशस्त्र र नेपाल प्रहरीको टोली परिचालन गरिएको थियो। 
घटनास्थलको मकवानपुरका प्रजीअ भरतमणी पाण्डे,मकवानपुर प्रहरी प्रमुख प्रहरी उपरीक्षक सुरेन्द्र बहादुर गुरुङ, शसस्त्र प्रहरी १४ नम्बर गणका एसपी नेत्र कार्की ,बागमती प्रदेशका पूर्व मुख्यमन्त्री डोरमणी पौडेलको टोलीले निरीक्षण गरेका थिए।निरीक्षणका क्रममा प्रजीअ पाण्डेले आगो निभाउन र उदार कार्यमा खट्न सुरक्षाकर्मीलाई निर्देशन दिएका थिए। 

आगलागीबाट गोदाममा रहेका ५० हजार बोरा भुस जलेर नष्ट भएको छ।आगलागीबाट करिब ४ करोड बराबरको क्षती भएको अनुमान गरिएको छ।छरिएर रहेका भुस र त्यसबाट हुने सम्भावित घटनालाई मध्यनजर गरेर एउटा दमकल र प्रहरीलाई घटनास्थलमा स्टेनबाई राखिएको प्रजीअ पाण्डेले प्रष्ट खबरलाई जानकारी दिए।