नेत्रहिन संघको महाधिवेशन हेटौँडामा

२६ असोज, हेटौँडा । नेपाल नेत्रहीन संघको दशौं केन्द्रीय महाधिवेशन शुक्रबार हेटौंडामा हुने भएको छ । ३५ जिल्लाका एक सय २२ जना प्रतिनिधिको सहभागितामा हुने महाधिवेशनले नयाँ केन्द्रीय नेतृत्व चयन गर्ने जनाइएको छ । 
संघले बिहीबार पत्रकार सम्मेलनको आयोजना गर्दै तीन वर्षको लागि रणनीति र कार्यनीतिसहित नयाँ केन्द्रीय समिति चयन गर्न लागेको जानकारी गराएको हो । बिहान १० बजेदेखि हेटौंडाको क्लव हेटौंडा पार्टी प्यालेसमा महाधिवेशन शुरु हुने जनाइएको छ । महाधिवेशन उद्घाटनपूर्व हेटौंडाको वुद्धचोकबाट नेत्रहीन संघले ¥याली निकाल्नेसमेत जनाइएको छ । महाधिवेशनबाट १७ सदस्यीय केन्द्रीय कार्यसमिति चयन गरिने अध्यक्ष रमेश पोखरेलले जानकारी दिए । 
पत्रकार सम्मेलनमा बोल्दै संघका केन्द्रीय अध्यक्ष पोखरेलले दृष्टिबिहीनलाई रोजगारी, गुणस्तरीय शिक्षामा राज्यलेसमेत पछाडि पारिरहेको आरोप लगाए । पछिल्लो समय विकसित प्रविधि दृष्टिबिहीनमैत्री नभएकोसमेत उनले बताए । २०६८ सालको जनगणनाको तथ्याङ्कले नेपालमा ९५ हजार जना दृष्टिबिहीन रहेको तथ्याङ्क सार्वजनिक गरे पनि नेत्रहीन संघले भने करिब दुई लाख दृष्टिबिहीन रहेको दाबी गरेको छ । 
कार्यक्रममा संघका केन्द्रीय सचिव शिशिर खनाल, केन्द्रीय सदस्य खोमराज शर्मा, नेत्रहीन पुनस्र्थापन कार्यक्रमका फिल्ड अफिसर प्रेम महर्जन, मकवानपुर अध्यक्ष प्रविन ग्वाछाँ, किर्तन श्रेष्ठलगायतको सहभागिता रहेको थियो ।