नेपाल प्रहरीको काम प्रशंसनीय : बानियाँ

२७ असोज, हेटौंडा । ६२ औं प्रहरी दिवसको अवसरमा पूर्व गृहराज्यमन्त्री ईन्द्रबहादुर बानियाँले शुभकामना सन्देश दिएका छन् । आफ्नो आधिकारिक फेसबुक पेजमार्फत बानियाँले दिवसको अवसरमा नेपाल प्रहरीलाई शुभकामना दिएका हुन् । 
शुभकामना सन्देशमा बानियाँले देशमा शान्ति सुरक्षा बहाल गर्न राज्यले सुम्पिएको जिम्मेवारी पूरा गर्ने क्रममा जीवन अर्पण गर्ने अमर प्रहरीप्रति श्रद्धाञ्जली व्यक्त गरेका छन् । उनले नेपाल प्रहरी नागरिकसंग प्रत्यक्ष सहकार्यमा रही देशमा शान्ति सुरक्षा, अमनचयन कायम गराउने काममा खटिएको पुरानो सुरक्षा संगठन भएको बताउँदै ईतिहासदेखि वर्तमानसम्म उच्च मनोवलका साथ देश र जनताको सेवामा खटिएकोमा आभार समेत व्यक्त गरेका छन् । 
नेपालको संविधान २०७२ को पूर्ण कार्यान्वयन गर्ने क्रममा राज्यले दिएको जिम्मेवारी अनुसार स्थानीय तहको निर्वाचन सम्पन्न गर्न नेपाल प्रहरीले खेलेको भुमिका प्रशंसनीय रहेको पूर्व गृहराज्यमन्त्री बानियाँको भनाई छ । आसन्न प्रतिनिधि र प्रदेश सभामा पनि नेपाल प्रहरी उच्च मनोवलका साथ परिचालन हुने विश्वास व्यक्त गर्दै नागरिकले सधै नेपाल प्रहरीलाई साथीको रुपमा लिने वातावरण बनाउन सुझाव दिएका छन् ।