निर्वाचनको वातावरण तयार गर्नु आवश्यक : बानियाँ

३० असोज, हेटौँडा । पूर्व गृहराज्यमन्त्री एवं नेपाली कांग्रेस मकवानपुरका सभापति ईन्द्रबहादुर बानियाँले आसन्न प्रतिनिधि र प्रदेश सभा निर्वाचनको वातावरण तयार गर्न सबै राजनैतिक दललाई आग्रह गरेका छन् । 
नेपाली कांग्रेस मकवानपुरले सोमबार जिल्ला पार्टी कार्यालयमा गरेको चियापान तथा शुभकामना आदानप्रदान कार्यक्रममा बोल्दै बानियाँले मंसिरमा हुने दुई तहको निर्वाचन सम्पन्न गर्न सबै दलले वातावरण तयार गर्नुपर्नेमा जोड दिए । अहिले राजनैतिक धु्रविकरण भईरहँदा जनतामा निर्वाचनबारे अन्यौलता देखिएको भन्दै निर्वाचनको वातावरण बनाउन राजनैतिक दल र कार्यकर्ता जुट्नुपर्ने बताए । 
उनले तोकेकै मितिमा निर्वाचन गराउन अहिलेको सरकार र नेपाली कांग्रेस लागि परेको बताउँदै आफ्नो क्षेत्रको विकास र समृद्धिमा योगदान पु¥याउनेलाई मत दिन मतदातालाई आग्रह गरे । यसअघि बानियाँले पार्टी कार्यालय परिसरमा रहेको महामानव विपि कोइरालाको सालिक अनावरण गरेका थिए । 
कार्यक्रममा जिल्ला समन्वय समिति मकवानपुरका प्रमुख रघुनाथ खुलाल, मकवानपुरका प्रमुख जिल्ला अधिकारी चक्रबहादुर बुढा, स्थानीय विकास अधिकारी नारायणप्रसाद मैनाली, प्रहरी उपरीक्षक बसन्तराज खनाल, उद्योग संघ मकवानपुरका अध्यक्ष नवराज अर्याल, मकवानपुर उद्योग बाणिज्य संघका अध्यक्ष राजकुमार न्यौपाने, विभिन्न राजनैतिक दलका नेता कार्यकर्ता, संघसंस्थाका प्रतिनिधि, शुभेच्छुकहरुको सहभागिता रहेको थियो ।