उद्यमशिलताबाटै आर्थिक समृद्धि : पुडासैनी

३१ असोज, हेटौँडा । जिल्ला समन्वय समिति मकवानपुरकी उपप्रमुख भगवति पुडासैनीले उद्यमशिलताबाटै आर्थिक समृद्धि हासिल गर्न सकिने भएकाले यसतर्फ लाग्न आग्रह गरेकी छिन् । 
चुच्चेखोला सामुदायिक वन उपभोक्ता समूहको आयोजना, जिल्ला वन कार्यालय,मकवानपुरको समन्वय र जुलोजिकल सोसाईटी अफ लण्डन, रेजिना फाउण्डेशनको सहयोगमा जिवीकोपार्जनका लागि व्यवसायिक छनौट तथा सीप विकास तालिमको समापन गर्दै पुडासैनीले उद्यमशिलता समृद्धिको मूल आधार भएको बताएकी हुन् । उनले व्यवसायिक योजना बनाएर काम गर्न सके सानो पूँजीबाट पनि आर्थिक उपार्जन गर्न सकिने बताउँदै समन्वय समितिले यसका लागि आवश्यक सहयोग गर्ने प्रतिवद्धता व्यक्त गरिन् । 
कार्यक्रममा मकवानपुर गढी–२ का वडा अध्यक्ष बखानसिं पाख्रिन, सहायक वन अधिकृत टंकनारायण श्रेष्ठ, संचारकर्मी भीमसेन पौडेल, वन समूहका सचिव केदार गौतम लगायतले मन्तव्य व्यक्त गरेका थिए । वन समूहका अध्यक्ष अर्जुनप्रसाद दाहालको अध्यक्षतामा भएको कार्यक्रममा जुलोजिकल सोसाईटी अफ लण्डन सिमराका कार्यक्रम संयोजक प्रकाश सिग्देल, सामुदायिक वन उपभोक्ता महासंघका जिल्ला सदस्य कुमारसिं खड्का, हर्नामाडि इलाका वन कार्यालयका सहायक वन अधिकृत शालिकराम भट्टराई, समूहकी सचिव सरिता गौतम लगायतको सहभागिता रहेको थियो । 
समूहमा रहेका दलित, गरिव, सीमान्तकृत, जनजाती उपभोक्ता गरी ३५ जनाको सहभागिता रहेको तालिममा हेटौडा उपमहानगरपालिका प्रवन्धक विके महर्जन, उद्यम विकास शाखाका सहजकर्ता विकास श्रेष्ठ र लेखमान राउतले सहजीकरण गरेका थिए ।