मकवानपुर–१ मा थापा उठाउने निर्णय

६ कार्तिक, हेटौँडा । राष्ट्रिय प्रजातन्त्र पार्टीले अध्यक्ष कमल थापालाई मकवानपुर क्षेत्र नम्बर १ का प्रतिनिधि सभामा उम्मेदवार बनाउने भएको छ । प्रतिनिधि सभा निर्वाचनका लागि उम्मेदवार टुंगो लगाउने क्रममा राप्रपाले थापालाई मकवानपुर क्षेत्र नम्बर १ बाट उम्मेदवार बनाउने निर्णय गरेको हो । राप्रपाले अध्यक्ष थापासहित प्रत्यक्षतर्फका ५ उम्मेदवारको नाम टुंगो लगाएको प्रवक्ता भुवन पाठकलाई उदृत गर्दै अनलाईन खबरले समाचार बनाएको छ । 

राप्रपाबाट मकवानपुर–१ मा पार्टी अध्यक्ष कमल थापा, पर्सा–१ मा उपाध्यक्ष राजीव पराजुली, झापा–३ मा महामन्त्री राजेन्द्र लिङ्देन, दैलेख–१ मा कुन्तीकुमारी शाही र काठमाडौँ–७ मा विक्रम थापाले प्रत्यक्षतर्फको उम्मेदवारी दिने पार्टीले जनाएको छ । आगामी मंसिर–२१ गते हुने निर्वाचनका लागि लोकतान्त्रिक गठबन्धनले राप्रपालाई ७ स्थान दिन तयार भएको र बाँकी २ स्थानका लागि र उम्मेदवारको छनोट हुन बाँकी रहेको प्रवक्ता भुवन पाठकले जानकारी दिए ।

प्रदेशसभा निर्वाचनका लागि पार्टीले हालसम्म धादिङ (ख) बाट सोनाम तामाङ, बैतडी (ख) बाट गणेश चन्द, म्याग्दी (क) बाट भीमप्रसाद गौचनलाई उम्मेदवारका रूपमा तय गरेको जनाइएको छ ।