निर्वाचन सुनिश्चित गर्न सरकारमा : थापा

७ कार्तिक, हेटौँडा । उपप्रधान तथा उर्जामन्त्री कमल थापाले आफ्नो पार्टी आगामी प्रतिनिधि र प्रदेश सभा निर्वाचन सुनिश्चित गर्न सरकारमा गएको दावि गरेका छन् ।
राप्रपा मकवानपुरले मंगलबार हेटौँडामा गरेको स्वागत कार्यक्रममा बोल्दै थापाले निर्वाचन सुनिश्चित गर्न मात्रै आफुहरु सरकारमा गएको दावि गरे । सत्तारुद दल नेकपा माओवादी प्रतिपक्षी दल नेकपा एमालेसँगको गठबन्धनमा गएपनि निर्वाचन धरापमा परेको उनको भनाई थियो । आफ्नो पार्टी र आफुलाई सत्ता लिप्साको आरोप लाग्ने गरेको भन्दै राप्रपा अध्यक्ष समेत रहेका थापाले राजनैतिक स्थिरता र निर्वाचन समयमै हुने सर्तमा मात्रै सरकारमा सामेल भएको बताए । 
आफु मकवानपुर क्षेत्र नम्बर १ बाट उम्मेदवारी दिने तयारीमा रहेको बताउँदै उनले केन्द्रीय अध्यक्ष भएका नाताले देशभर पुग्नुपर्ने बाध्यतालाई बुझिदिन समेत आग्रह गरे । हेटौँडालाई प्रदेशको राजधानी बनाउने प्रतिवद्धता व्यक्त गर्दै बैकल्पिक शक्तिको खाँचो राष्ट्रिय राजनीतिमा आवश्यक पर्ने भएकाले राप्रपाको विजय आवश्यक रहेको उनको भनाई थियो । 
जिल्ला अध्यक्ष गणेश थापाको अध्यक्षतामा भएको कार्यक्रममा केन्द्रीय सदस्य दिपकबहादुर सिंह, मधु अधिकारी, पूर्व केन्द्रीय सदस्य नवराज विष्ट, पूर्व जिल्ला अध्यक्ष रामहरी न्यौपाने लगायतले मन्तव्य व्यक्त गरेका थिए ।