एल्ड्रिन प्रधानले हेटौँडामा गाउने

८ कार्तिक, हेटौँडा । लागुऔषध दुव्र्यसन विरुद्ध सचेतना अभिबृद्धि गर्ने उद्देश्यले हेटौँडामा सांगितिक कार्यक्रम हुने भएको छ । लागुऔषध दुव्र्यसन न्यूनिकरणको क्षेत्रमा काम गर्दै आएको दिपकला प्रतिष्ठानले कार्तिक २५ गते सचेतनामुलक कार्यक्रम र सांगितिक कार्यक्रम गर्ने बुधबार पत्रकार सम्मेलन गरी जानकारी दिएको हो । 
सिद्धार्थ माविको चौरमा हुन लागेको कार्यक्रममा गायक एल्ड्रिन प्रधानसहित राष्ट्रिय गायक, नेपाल आईडलका टप टेनमध्ये केही गायकसहित हेटौँडाको भीमफेदी गाईज लगायतका कलकार टोलीको सहभागिता रहने प्रतिष्ठानका अध्यक्ष अजित राईले बताए । कार्यक्रममा देशका चर्चित मोडल र हेटौँडाका विभिन्न समुदायका परम्परागत भेषभुषासहित १२ जना कलाकारहरुको सहभागिता रहने कार्यक्रम संयोजक एवं संस्थाका सचिव श्याम पराजुलीको भनाई छ । 
१५ लाख रुपैंया खर्च हुने अनुमान गरिएको कार्यक्रमबाट बचत भएको रकमबाट मकवानपुरमा लागुऔषधको कुलतमा परी पुर्नस्थापनाका लागि आएका ३० जनालाई एकबर्ष तालिम र उनीहरुको माग अनुसार औपचारिक शिक्षाका लागि सहयोग गर्ने जनाईएको छ । संस्थाका अनुसार मकवानपुरमा सुईबाट लागुऔषध लिनेको संख्या ७ सय जनाको हाराहारीमा रहेको भन्दै अन्य प्रयोगकर्ताहरुको संख्या ठूलो रहेको बताए । 
प्रतिष्ठानका अध्यक्ष राईले संगठित र व्यस्थित रुपमै लागुऔषध दुव्र्यसन नियन्त्रणको क्षेत्रमा काम गर्न सबैको सहयोग आवश्यक रहेको समेत बताए ।