नवोदय शिशु सदनको आयोजनामा भानु जयन्ती विशेष कार्यक्रम सम्पन्न

२९ असार, हेटौंडा । २०९ औं भानु जयन्ती विशेष अवसरमा हेटौंडामा आयोजित स्थलगत कविता लेखन तथा वाचन प्रतियोगितामा नगरका विभिन्न विद्यालयका तीन विद्यार्थीहरु उत्कृष्ट हुन सभफल भएका छन् । 
हेटौंडा उपमहानगरपालिकाको आयोजना तथा नवोदय शिशु सदन अंग्रेजी माध्यमिक विद्यालयको समन्वयमा बुधबार भएको प्रतियोगितामा सोलिड्यारिटी इन्टरनेशनल बोर्डिङ स्कूलका प्रज्ञान पन्त, सत्यम जेभियर्सका बोर्डिङ स्कूलका स्तुति कर्ण र जीएस निकेतन विद्यालयका समर्पण न्यौपाने उत्कृष्ट घोषित भएका हुन् । 
प्रतियोगितामा उत्कृष्ट भएका विद्यार्थीहरुलाई नगद पुरस्कार सहित शिल्ड र प्रमाणपत्र प्रदान गरिएको छ । प्रतियोगितामा जिएस निकेतन विद्यालयका सारा केसी सान्त्वना भइन् । 
नगरभित्रका विभिन्न सामुदायिक तथा संस्थागत विद्यालय कक्षा ९ र १० मा अध्ययनरत २९ जना विद्यार्थीले प्रतियोगितामा सहभागिता जनाएका थिए । जसमा ७ वटा कविता निर्णायकले छनौट गरी विद्यार्थीले वाचन गरेका थिए । 
नवोदय साहित्यक बगैँचा बाल क्लबकी अध्यक्ष दर्शना सापकोटाको अध्यक्षत एवं हेटौंडा उपमहानगरपालिका शिक्षा विकास महाशाखा प्रमुख गंगाघर रिमालको विशिष्ट आतिथ्यतामा भएको कार्यक्रममा शिक्षा अधिकृत रामचन्द्र खड्का र राजमणि शर्मा लगाएतको उपस्थिति रहेको थियो । 
महाशाखाले विद्यार्थीको सिकाइसँगै अतिरिक्त क्रियाकलापलाई पनि जोड दिँदै विभिन्न कार्यक्रम सञ्चालन गर्दै आइरहेको कार्यक्रमका संयोजक तथा विद्यालयका नेपाली भाषा शिक्षक सिएम रिमालले जानकारी दिए । 
उक्त कार्यक्रमको अवसर पारेर साहित्यकार तथा अधिवक्ता ऋषि के.वीको रगतले लेखिएको इतिहास पहिलो गजल नाटक मञ्चन समेत भएको थियो । उक्त नाटकमा साहित्यकार पुरुषोत्तम आचार्यले स्वर दिएका थिए भने निर्देशक आशाकाजी श्रेष्ठले निर्देशन गरेका थिए । प्रतियोगितामा साहित्यकार पुष्प पराग, छवि अनित्य, ऋषि केवीले निर्णायकको भूमिका निर्वाह गरेका थिए । 
यस्तै नवोदय साहित्यिक बगैँचा बाल क्लवका उपाध्यक्ष रोनश उप्रेतीले शिक्षामा हुने परिवर्तन विषयक बहस कार्यक्रम सञ्चालन गरेका थिए । 
बहसमा मकवानपुर बाल विद्या सदनकी प्रिन्शा कार्की, जीएस निकेतनकी निमिशा निरौला,  आधुनिक माविका रत्नाकर कुमार साह, जनज्योति मावि मयुरधापका सौरज देवकोटा तथा नवोदय शिशु सदनका निर्भीक ज्ञवालीले अहिलेको समयमा विद्यार्थीलाई कस्तो शिक्षा दिनुपर्छ भन्ने विषयमा सरिक भएर आ–आफ्ना धारणा राखेका थिए । 
कार्यक्रममा साहित्यकार डि.बी बर्तौला, दीपक गौतम, नवोदय विद्यालयका विद्यार्थीले भानु जयन्तीसम्बन्धि कविता तथा गीत प्रस्तुत गरेका थिए ।