हेटौंडामा आजबाट तीनपाङ्ग्रे सवारी व्यवस्थापन गरिँदै

 १९ साउन, हेटौंडा । हेटौंडा उपमहानगरपालिकाले आज बिहीबारबाट तीनपाङ्ग्रे सवारीलाई व्यवस्थित गर्ने भएको छ । अव्यवस्थित सञ्चालन भैरहेको तीनपाङ्ग्रे सवारीका कारण प्रदेशको राजधानी हेटौंडा कुरुप हुनुको साथै दुर्घटना समेत बढ्दै गएपछि उपमहानगरपालिकाले व्यवस्थित गर्न लागेको हो ।
बिहान साढे १० बजेबाट नगर क्षेत्रमा सञ्चालन हुने सवारीलाई स्टीकर टाँस गर्न लागिएको हो । जिल्ला ट्राफिक प्रहरी कार्यालय परिसरबाट स्टीकर टाँस अभियानको शुभारम्भ हुने बताइएको छ । 
हेटौंडामा मनलाग्दी सञ्चालन भैरहेको तीनपांग्रे सवारीले दुर्घटना समेत बृद्धि भैरहेको छ । उपमहानगरले आफ्नो क्षेत्रभित्र सञ्चालन अनुमति प्राप्त सवारीलाई सञ्चालन अनुमति सहितको स्टिकर प्रदान गर्न लागेको हो । 
सोमबार बसेको उपमहानगरको कार्यपालिका बैठकले हेटौंडामा सञ्चालनको परमिट लिएका तीनपाङ्ग्रे सवारी साधनलाई नगरभित्र सञ्चालन अनुमतिको स्टीकर प्रदान गर्ने निर्णय गरेको थियो । 
गत असार ३२ गते उपमेयर राजेश बानियाँको अध्यक्षतामा बसेको पार्किङ व्यवस्थापन समितिको बैठकबाट गठित दुई उपसमितिले यातायात व्यवसायी, ट्राफिक प्रहरी सहित विभिन्न सरोकारवाला संगको पटक पटकको छलफल र स्थलगत निरीक्षणबाट प्राप्त सुझावको आधारमा कार्यपालिकाले यस्तो निर्णय गरेको बताइएको छ । 
यसअघि २०७६ पुस ७ गतेको बैठकले हेटौंडा उपमहानगर क्षेत्रमा तीनपाङ्ग्रे सवारी साधन दर्ता अनुमति नदिने निर्णय गरेको थियो । उक्त मिति पछि विभिन्न पालिका तथा अन्य जिल्लामा सञ्चालन अनुमति (परमिट) लिएर हेटौंडा बजार क्षेत्रमा अनाधिकृत सञ्चालन भइरहेका तीनपाङ्ग्रे सवारी साधनलाई निषेध गर्ने गरी यो निर्णय गरिएको उपमहानगरपालिकाका प्रवक्ता सविन न्यौपानेले जानकारी दिए । 
स्टीकर प्रदान गरेसंगै हेटौंडा उपमहानगर क्षेत्रमा सञ्चालन अनुमति लिएका तीनपाङ्ग्रे सवारी बाहेकलाई सञ्चालन निषेध गरिने भएको छ ।