मकवानपुरमा शुरु भयो उम्मेदवारको चर्चा

२२ साउन, हेटौंडा । सरकारले मंसिर ४ गतेका लागि प्रतिनिधिसभा र प्रदेशसभा निर्वाचनको मिति तोकेपछि मकवानपुरमा पनि उम्मेदवारको चर्चा शुरु भएको छ । मकवानपुरमा सर्वसाधारण र पार्टीका नेता कार्यकर्तामाझ आगामी निर्वाचनमा उम्मेदवार हुन सक्नेहरुबारे चर्चा शुरु भएको हो ।
सर्वसाधारण र पार्टीका नेता कार्याकर्ताहरु ठूला दल नेकपा एमाले, नेपाली कांग्रेस, माओवादी केन्द्रका साथै राष्ट्रिय राजनीतिमा रही मकवानपुरमा क्रियाशिल एकिकृत समाजवादी, राप्रपा, राप्रपा नेपाल लगायतका दलबाट सम्भावित उम्मेदवारहरुको प्रारम्भिक चर्चा गरिरहेका छन् । मकवानपुरको प्रतिनिधिसभातर्फ इन्द्रबहादुर बानियाँ, कृष्णप्रसाद दाहाल, कमल थापा, डोरमणि पौडेल, बिरोध खतिवडा, महालक्ष्मी उपाध्याय डिना, राजाराम स्यांतान लगायतका नेताहरु चुनावी मैदानमा आउन सक्ने चर्चा छ ।
त्यस्तै, प्रदेशसभातर्फ प्रेमबहादुर पुलामी, अशोक शाक्य, दिपकबहादुर सिंह, कुमारी मोक्तान, मुनु सिग्देल लगायतका नेताहरुबारे चर्चा भईरहेको छ । विगतमा उम्मेदवारी दिएका र सांसद भईसकेकाहरु को दोहोरिएलान् र गठबन्धनका कारण को पछि हट्नुपर्ने हो भन्ने बारेमा उनीहरुको चासो रहेको पाईएको छ । यस्तै, ठूला र क्रियाशिल दलका साथै नयाँ दल र स्वतन्त्र दलबाट युवा पुस्ताका नेताहरुको उम्मेदवारी आउन सक्ने भएपनि सर्वसाधारण यसबारे अहिले नै एकिनमा पुगिसकेको पाईदैन । 
कांग्रेस नेतृत्वको गठबन्धनसंगै एमालेले राप्रपासहितको गठबन्धन बनाउने करिब निश्चित रहेको उनीहरुको अनुमान छ । दुई गठबन्धनको टुंगोपछि मात्रै उम्मेदवारबारे स्पष्ट खाका आउने मकवानपुरका राजनैतिक दलका नेताहरुको भनाई छ । सर्वसाधारण भने अबको निर्वाचनका उम्मेदवारीमा नयाँ पुरानाको मिश्रण हुनुपर्ने धारणा राख्छन् ।