देश चलाउन भिजन होइन, मुटु चाहिन्छः लामिछाने

२७ साउन, हेटौंडा । राष्ट्रिय स्वतन्त्र पार्टीका सभापति रवि लामिछानेले देश चलाउन भिजनले मात्र नहुने, मुटु चाहिने बताएका छन् । उनले शुक्रबार बागमती प्रदेशको राजधानी हेटौंडामा आयोजना गरिएको प्रदेशस्तरीय भेलालाई सम्बोधन गर्दै देश चलाउन भिजन भन्दा मुटु चाहिने बताएका हुन् ।
उनले दलका नेताहरुले स्वाभिमान बेचेका कारण आफूहरु राजनीतिमा आएको दावी पनि गरे । दलका नेताहरु भ्रष्ट र विदेशीको इशारामा चलेका कारण देशले बिकासमा फड्को मार्न नसकेको बताए । अब देशको जिम्मेवारी युवा पुस्ताले लिने बेला आएको लामिछानेको भनाई थियो ।
उनले देशमा उपलब्ध पुर्वाधारको समुचित उपयोग गरे मात्रै पनि देश विकास गर्न सक्ने बताउँदै नेपालको विकासमा पर्यटनको विकास गर्नुपर्ने औंल्याए । भ्रष्टचार गर्न र कार्यकर्ता पाल्नकै लागी दलहरुले भागबन्डाको राजनिति गरेको आरोप लगाउँदै बागमती प्रदेशमा १८ सदस्यीय मन्त्रालयको आवस्यकताको औचित्य पुष्टि गर्न चुनौति दिए ।
सभापति लामिछानेले सरकारले चलाएका उद्योग कलकारखाना सधैं घाटामा जाने तर निजि उद्योग भने सधैं नाफामा जानुको कारण के हो ? सरकारमा बसेकाहरुले जवाफ दिनुपर्ने बताए । उनले ठगिखान पल्केकाहरुलाई साइजमा ल्याउने बेला आएको बताउँदै मंसिर ४ गते हुने निर्वाचनमा आफ्नो पार्टीका उम्मेदवारहरुलाई मत दिएर सरकारमा जाने वतावरण बनाइदिन आग्रह गरे ।