लोकतान्त्रिक गठबन्धनको भेलाले संयोजक तोक्यो

कांग्रेस पार्टी कार्यालयमा भएको क्षेत्रीय भेला ।

२३ कार्तिक, हेटौँडा । लोकतान्त्रिक गठबन्धनको चुनावी अभियान अन्तरगत हेटौँडामा संयुक्त भेला सम्पन्न भएको छ ।  भेलाले नेपाली कांग्रेसका क्षेत्रीय सभापति दामोदर खनाल संयोजक र राप्रपाका क्षेत्रीय अध्यक्ष राजराम अर्याल सहसंयोजक रहेको १ हजार ५१ सदस्यीय निर्वाचन परिचालन समिति गठन गरेको छ । 
भेलाले बकैया गाउँपालिकामा मिठाराम दाहाल, बाग्मति गाउँपालिका चोकबहादुर ठाडा मगर, गढी गाउँपालिकामा सुवातसिं थिङ, सविक हटिया गाविसका लागि नवराज न्यौपाने र हर्नामाडि गाविसमा हरेराम बानियाँ संयोजक रहेको निर्वाचन परिचालन समिति गठन गरेको छ । भेलाले कार्तिक २४, २५ र २६ गते निर्वाचन क्षेत्रमा कार्यक्रम गर्ने निर्णय गरेको छ । 
पूर्व गृहराज्यमन्त्री एवं नेपाली कांग्रेस मकवानपुरका सभापति ईन्द्रबहादुर बानियाँको प्रमुख आतिथ्यता एवं कांग्रेस क्षेत्रीय सभापति दामोदर खनालको सभाध्यक्षतामा भएको कार्यक्रममा राप्रपाका जिल्ला अध्यक्ष गणेश थापा, प्रतिनिधि सभा क्षेत्र नम्बर १ निर्वाचन परिचालन समिति संयोजक माइकल रामचन्द्र अर्याल, प्रतिनिधिसभा १ को प्रदेशसभा १ का उम्मेदवार धर्मराज लामिछाने लगायतले मन्तव्य व्यक्त गरेका थिए ।
यसअघि, नेपाली कांग्रेस मकवानपुर क्षेत्र नम्बर १ को क्षेत्रीय भेला कांग्रेस पार्टी कार्यालयमा भएको थियो ।