मानवसेवा आश्रम ११ औं बर्षमा, सप्ताहव्यापी कार्यक्रम गरिने

७ भदौं, हेटौंडा । सडकमा कष्टकर जीवन बिताउन बाध्य मानिसको सेवा गर्ने उद्देश्यका साथ स्थापना भएको मानवसेवा आश्रम ११ औं बर्षमा प्रवेश गरेको छ । आश्रमको मानवीय सेवा यही भदौ १३ गतेबाट ११ औं बर्षमा प्रवेश गर्न लागेको हो । 
आश्रमको बार्षिकोत्सवको अवसरमा विविध सप्ताहव्यापी कार्यक्रमको आयोजना हुने भएको छ । २०६९ जेठ २१ देखि २७ गतेसम्म हेटौंडामा आयोजना गरिएको सप्ताहव्यापी कार्यक्रमबाट मानवताको सेवाका लागि मानवसेवा आश्रमको परिकल्पना गरिएको थियो । सोही बर्ष भदौ १३ गते औपचारिक रुपमा मानवसेवा आश्रमको समुद्घाटन गरी सेवा शुभारम्भ भएको थियो । 
अहिलेको अवस्थासम्म आइपुग्दा मानवसेवा आश्रमले नेपालको ७ वटै प्रदेशको १९ जिल्लामा शाखा विस्तार गरी ७७ वटा जिल्लामा सहयोगापेक्षी सडक आश्रित मानिसहरुको उद्दार, औषधी उपचार, लालनपालन, पारिवारिक पुनर्मिलन र मानवता प्रवद्र्धनको कार्य गर्दै आएको छ । 
आश्रमले आज मंगलबारबाट सप्ताहव्यापी कार्यक्रम गर्दै छ । पहिलो दिन आज हेटौंडाको बुद्धचोकमा रक्तदान कार्यक्रम हुनेछ भने ८ गते मानवसेवा आश्रम परिसरमा वृक्षरोपण, ९ गते मानवसेवा आश्रमको मुख्य कार्यालय रहेको धापटोल सरसफाई, दिउँसो आश्रममै तीज विशेष कार्यक्रम गरिने छ ।
यस्तै भदौं १० गते  सहयोगापेक्षी सडक आश्रित मानवहरूको वृहत उद्दार, ११ गते मुठ्ठीदान संकलन कार्यक्रम, सोही दिन कुशेऔँशी विशेष कार्यक्रम, १२ गते दीप प्रज्वलन कार्यक्रम, बेलुका भजन सन्ध्या तथा १३ गते वार्षिकोत्सव समापन कार्यक्रम गरिने मानवसेवा आश्रमका अध्यक्ष रामजी अधिकारीले जानकारी दिए ।
१० बर्षमा ७२६३ जनाको उद्दार
मानवसेवा आश्रमले १० वर्षको अवधिमा देशभरबाट ७ हजार २६३ जनाको उद्दार गरेको छ । देशैभर १९ जिल्लाको २३ वटा सेवा केन्द्रहरुमा अहिले एकहजार ४८० जनाले सेवा लिइरहेका छन् । आश्रममा रहँदा हालसम्म ७९५ जनाको मृत्यु भएको छ । 
३ हजार ४०९ जनाको परिवारिक पुनःमिलन भएको र ३५९ जनाले स्वेच्छाले आश्रमबाट बाहिर गएर स्वावलम्वी भएको मानवसेवा आश्रमको तथ्यांकले देखाएको छ । आश्रमको मुख्य कार्यालय हेटौंडाले भने यो १० बर्षको अवधिमा एकहजार ४३७ जनाको उद्दार गरेको छ । 
हालः हेटौंडामा २०० जना आश्रित रहेका छन् । मुख्य कार्यालय हेटौंडाबाट ७५८ जनाको पारिवारिक पुनःमिलन गराइएको र ३५९ जनाको आश्रममै मृत्यु भएको छ ।