मानवसेवा आश्रमको बार्षिकोत्सवमा २८ जनाले गरे रक्तदान

८ भदौं, हेटौंडा । सहयोगापेक्षी सडक आश्रित मानिसहरुको उद्दार, संरक्षण एवम् पालनपोषण गर्दै आएको मानवसेवा आश्रमको आयोजनामा बुद्धचोकमा भएको रक्तदान कार्यक्रममा २८ जनाले रक्तदान गरेका छन् । 
आश्रमले दशौं बार्षिकोत्सव अन्तर्गत सप्ताहव्यापी कार्यक्रम सुरु गर्दै बार्षिकोत्सवको पहिलो दिन मंगलबार रक्तदान कार्यक्रम गरेको हो । 
हेटौंडाको मानवसेवा आश्रमले बागमती प्रदेशको स्वास्थ्य मन्त्रालय र नेपाल रेडक्रस सोसाइटी मकवानपुर शाखासंगको सहकार्यमा रक्तदानको आयोजना गरिएको आश्रमका अध्यक्ष रामजी अधिकारीले जानकारी दिए । 
सप्ताहव्यापी कार्यक्रम अन्तर्गत बुधबार मानवसेवा आश्रम परिसरमा वृक्षरोपण, ९ गते मानवसेवा आश्रमको मुख्य कार्यालय रहेको धापटोल सरसफाई, दिउँसो आश्रममै तीज विशेष कार्यक्रमको आयोजना गरिने अधिकारीले जानकारी दिए ।
यस्तै १० गते सहयोगापेक्षी सडक आश्रित मानवहरूको वृहत उद्दार, ११ गते मुठ्ठीदान संकलन कार्यक्रम, सोही दिन कुशेऔंशी विशेष कार्यक्रम, १२ गते दीप प्रज्वलन कार्यक्रम, बेलुका भजन सन्ध्या तथा १३ गते वार्षिकोत्सव समापन कार्यक्रम गरिने कार्यतालिका रहेको छ । 
यो अवधिमा आइपुग्दा आश्रमले करिब ७ हजार ५ सयजना विभिन्न उमेर समूहका सहयोगापेक्षी सडक आश्रित मानवहरुको उद्वार गरिसकेको छ । आश्रमले सात प्रदेशको १९ जिल्लाको २३ वटा सेवा केन्द्रमार्फत सेवा दिइरहेको छ ।