तिलगंगा आँखा अस्पताल हेटौंडा सार्ने तयारी

१२ भदौ, काठमाडौं । तिलगंगा आँखा अस्पताललाई हेटौंडा सार्ने विषयमा छलफल भएको छ । अस्पतालका संस्थापक डा. सन्दुक रुइतसहितको टोली आइतबार अर्थमन्त्री जनार्दन शर्मा ‘प्रभाकर’लाई भेट्न अर्थमन्त्रालय पुगेको थियो। 
भेटमा तिलगंगा आँखा अस्पतालको टोलीले तिलगंगास्थित हालको भवन साँघुरो भएकाले हेटौँडामा स्थानान्तरण गर्ने योजनाबारे जानकारी गराएको छ । अस्पताल सार्नका लागि रुइतले सरकारसँग अनुदान माग गरेका छन् । अर्थमन्त्री शर्माले सहयोग गर्ने वचन दिए । यसका लागि ३० करोड रकम लाग्ने अनुमान गरिएको छ ।
आँखा अस्पताललाई प्रतिष्ठान वा विश्वविद्यालयका रूपमा विकसित गर्ने बारेमा पनि मन्त्रालयमा छलफल भएको छ । अहिले एनजीओको रुपमा सञ्चालनमा रहेको अस्पताललाई सरकारको मातहत ल्याउने विषयमा पनि छलफल भएको अर्थमन्त्री शर्माको सचिवालयले जानकारी दिएको छ ।
अर्थमन्त्रीसँगको भेटमा डा.रुइतले हाल तिलगंगाले वार्षिक साढे ३ लाख हाराहारीमा लेन्स बिक्री गरिरहेको जानकारी दिए । वार्षिक १० लाख पुर्याउने योजना रहेको पनि उनले सुनाए ।
डा. रुइतका अनुसार यस अस्पतालले उत्पादन गरेको लेन्सको सबैभन्दा बढी खपत चीनमा भइरहेको छ ।
(कान्तिपुरहेल्थबाट)