बागमती प्रदेशका मुख्यमन्त्रीको जिल्ला प्रशासन कार्यालय मकवानपुरको अवलोकन

१६भदौं,हेटौंडा। बागमती प्रदेशका मुख्यमन्त्री राजेन्द्रप्रसाद पाण्डेले जिल्ला प्रशासन कार्यालय मकवानपुरको अनुगमन गरेका छन्। मुख्यमन्त्री पाण्डेले बिहीबार बिहान कार्यालय समयमानै प्रशासन कार्यालयको अनुमान गरेका हुन्। 
उनले जिल्ला प्रशासन कार्यालयबाट प्रवाह हुने नागरिकता, राहदानी तथा विभिन्न सिफारिस र सोको बारेमा प्रत्यक्ष रुपमा जानकारी लिएका हुन।उनले उक्त सेवा प्रवाह हुने कक्षमा पुगेर सेवाग्राहीसँग कार्यालयको सेवा प्रवाहको अवस्थाबारे जानकारी लिएका हुन्। 

अवलोकनका क्रममा जिल्ला प्रशासन कार्यालय मकवानपुरका प्रमुख राजेन्द्र देव पाण्डेले मुख्यमन्त्री पाण्डेलाई कार्यालयले प्रदान गर्ने सेवा सुविधाका बारेमा अवगत गराएका थिए।त्यसैगरी मुख्यमन्त्री पाण्डेले प्रजिअ पाण्डेलाई  सेवाग्राहीलाई छिटो–छरितो सेवा उपलब्ध गराई सेवाग्राहीलाई आवश्यक पर्ने पूर्वाधार विकासका लागि पनि संरचना तयार सहित सेवा प्रवाहलाई प्रविधिमैत्री बनाउन निर्देशन दिएका थिए। 
उनले अवलोकनका क्रममा  आसन्न मङ्सिर ४ गते हुने प्रदेश र प्रतिनिधिसभाको निर्वाचनलाई स्वच्छ निष्पक्ष एवं भयरहित बनाउन आवश्यक शान्ति सुरक्षा उपलब्ध गराउनेतर्फ पनि सुरक्षा रणनीति तयार गर्न प्रजिअ पाण्डेलाई भने। 

सो अवसरमा मकवानपुरका सहायका प्रमुख जिल्ला अधिकारी बद्रीनाथ गैह्रेले प्रशासनिक सेवा तथा अर्धन्यायिक मुद्दाको फछ्र्यौट, नागरिक सेवा, राहदानी सेवा तथा अन्य सिफारिस सेवा, जिल्लाको शान्ति सुरक्षाको अवस्थाबारे मुख्यमन्त्री पाण्डेलाई जानकारी गराएका थिए।