लमजुङमा दुई थान भरुवा बन्दुक सहित एकजना पक्राउ

१६ भदौं,बेसिशहर। जिल्ला प्रहरी कार्यालय लमजुङले दुई थान गोली लोड गरेको भरुवा बन्दुक सहित एक युवकलाई पक्राउ गरेको छ।  भरुवा बन्दुकसहित क्व्होलासोंथर गाउँपालिका–८,घाम्राङका २७ वर्षीय यमबहादुर रानामगरलाई पक्राउ गरेको जिल्ला प्रहरी कार्यालय लमजुङका प्रहरी प्रमुख प्रहरी नायव उपरीक्षक प्रकाश श्रीमलले बताएका छन्। 

रानामगरको घरबाट  एउटा लोड गरेको र अर्को बनाएर अन्तिम चरणमा पुगेको भरुवा बन्दुक फेला पारेको प्रहरी प्रमुख  श्रीमलले बताएका छन्। 
उनले रानामगरले भरुवा बन्दुक लुकाइछिपाइ राखेको र स्थानीय मानिसलाई समेत धम्की दिने गरेको  भन्ने विशेष सूचनाको आधारमा इलाका प्रहरी कार्यालय भोर्लेटार र नजिकैको प्रहरी चौकीबाट गएको प्रहरी टोलीले भरुवा बन्दुक सहित रंगेहात पक्राउ गर्न सफल भएको प्रतिकृया दिए। 
उनको साथबाट भरुवा बन्दुक अनलोड अवस्थामा भेटिएकोबाट १८।५ ग्राम बराबरको ९ वटा छर्रा, कालो बारुद ४।९ ग्राम र कपडाको गज २ थान बरामद गरेको उल्लेख गरिएको छ।बन्दुकसहित पक्राउ परेका रानामगरलाई प्रहरीले आज सार्वजनिक गरिएको थियो जिल्ला अदालतबाट ७ दिनको म्याद अनुमति लिई थप अनुसन्धान थालिएको जनाइएको छ। 
भर्खरै सरुवा भई लमजुङ प्रहरी प्रमुखको नेतृत्व समाल्न पुगेका श्रीमलले जिल्लाको शान्ति सुरक्षा कायम गर्न कुनै कसुर बाँकी नराख्ने जनाएका थिए।