एमाले मकवानपुरमा पनि सिफारिस भए संघ र प्रदेशका उम्मेदवार

१८ भदौं,हेटौंडा । आगामी  मंसिर ४ मा हुने प्रतिनिधि सभा तथा प्रदेशसभा निर्वाचनको लागि विभिन्न दलहरुले उम्मेदवार सिफारिस गरि पठाउने क्रममा रहेका छन्। यसै क्रममा एमाले मकवानपुर पनि प्रतिनिधिसभा तथा प्रदेशसभाका लागि उम्मेदवारहरुको नाम सिफारिस गरेको छ। एमाले प्रतिनिधि तथा प्रदेशसभा निर्वाचन क्षेत्र समन्वय कमिटीको छुट्टा बैठकले सो नाम सिफारिस गरेको हो। एमालेले मकवानपुर क्षेत्र नम्बर १ को उम्मेदवारको लागि ५ जनाको नाम सिफारिस गरेको छ।

बैठकले नेकपा एमालेका केन्द्रीय सदस्य एवं मकवानपुर इन्चार्ज रामेश्वर राना,केन्द्रीय सदस्य तथा हालका प्रतिनिधि सभा सदस्य कृष्णप्रसाद दाहाल, मदनकुमार दाहाल,नरहरी महत र रमिला सापकोटालाई उम्मेद्वारका लागि सिफारिस गरेको हो ।त्यसैगरी शनिबार बसेको एमालेको प्रतिनिधि सभा निर्वाचन क्षेत्र समन्वय कमिटी क्षेत्र नम्बर २ को बैठकले ३ जनाको नाम सिफारिस गरेको हो ।
बैठकले नेकपा एमाले बागमती प्रदेश उपसचिव महेशकुमार बर्तौला, बागमती प्रदेश सदस्य सुवासचन्द्र ठकुरी र एमाले नेता बुद्धरत्न मानन्धरलाई उम्मेदवारको रुपमा सिफारिस गरेको हो।दुबै निर्वाचन क्षेत्रका उम्मेदवारको नाम
जिल्ला कमिटीलाई सिफारिस गरेको हो । एमालेको शुक्रबार चारै प्रदेशसभा निर्वाचन क्षेत्र समन्वय कमिटीको छुट्टाछुट्टै बसेको बैठकले जिल्लाको चार प्रदेशसभा निर्वाचन क्षेत्रको प्रत्यक्षतर्फ २३ जना सिफारिस गरेको थियो।
प्रतिनिधिसभा क्षेत्र नम्बर १ ‘क’ बाट प्रदेशसभामा अणराज जर्गामगर, राजकुमार तिमल्सिना, दिलबहादुर घिसिङ्ग, कृष्णप्रसाद चौलागाई, कमल विष्ट, नारायण सापकोटा, दिपक न्यौपाने र सीता बिष्टलाई सिफारिस गरेको हो।  

त्यस्तै प्रदेशसभा १  ‘ख’ बाट रघुनाथ खुलाल, श्रीधर पोखरेल, एकलाल श्रेष्ठ, भोजराज ढकाल, सम्राट तुम्बाहाम्फे, धुव्रप्रसाद चौलागाई, आरती पाठक र कुमार केसीको नाम सिफारिस गरिएको  हो ।
त्यसैगरी एमालेले मकवानपुर प्रतिनिधिसभा क्षेत्र नम्बर–२ को (क ) बाट  प्रदेशसभामा  बलराम बल, विष्णु ढकाल र चमेलीमायाँ वाइवाको नाम  सिफारिस गरेको छ। त्यसैगरी  प्रदेशसभा ’ख’ बाट लालबहादुर थापा, सुरेन्द्र पाठक, श्यामप्रसाद ढकाल र पम्फा रोक्को सिफारिस गरिएको एमाले मकवानपुर श्रोतले बताएको छ।