चिनियाँ जनकँग्रेसका अध्यक्ष ली काठमाडौँमा 

२७ भदौं, हेटौंडा । चिनियाँ जनकाँग्रेसका अध्यक्ष ली चान्सु चार दिने भ्रमणको लागि सोमबार काठमाडौँ आइपुगेका छन । सभामुख अग्नि सापकोटाको मैत्रीपूर्ण निमन्त्रणामा नेपाल आएका ली साढे ३ बजे त्रिभुवन विमानस्थलमा उत्रिएका हुन् । 
चिनियाँ विशेष विमानबाट ६७ जनाको प्रतिनिधिमण्डलको नेतृत्व गर्दै भ्रमणमा आएका लीलाई सभामुख सापकोटा, राष्ट्रियसभाका अध्यक्ष गणेश तिमल्सिना र परराष्ट्र मन्त्रालयका अधिकारीहरूले स्वागत गरेका थिए । अध्यक्ष लीले आजैबाट आफ्नो राजनितिक भेटघाटलाई तिव्रता दिने बताइएको छ । उनले आज साँझ नै सभामुख सापकोटासँग द्विपक्षीय भेटघाट गर्ने तालिका रहेको छ । 
यस्तै अध्यक्ष लीले राष्ट्रियसभाका अध्यक्ष गणेश तिमल्सिना, नेकपा एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डसँग पनि छुट्टाछुट्टै भेटवार्ता गर्ने तालिका रहेको छ ।
यसैगरी मंगलबार नै परराष्ट्रमन्त्री नारायण खड्कासँग भेटवार्ता गर्ने अध्यक्ष लीले प्रधानमन्त्री शेरबहादुर देउवा र राष्ट्रपति विद्यादेवी भण्डारीसँग पनि भेट्ने कार्यक्रम रहेको छ । त्यसपछि बिहीवार बिहान चिनियाँ जनकंग्रेस अध्यक्ष ली नेतृत्वको प्रतिनिधिमण्डल दक्षिण कोरिया प्रस्थान गर्ने बताइएको छ ।