म्यादी प्रहरीका लागी एकै दिन मकवानपुरमा ३४९ को दरखास्त

३० भदौ,हेटौंडा। सरकारले आगामी मंसिर ४ गते हुने प्रतिनिधिसभा तथा प्रदेशको निर्वाचनका लागी खुल्ला गरिएको म्यादी प्रहरी भर्ना कार्यक्रमका लागि एकै दिन मकवानपुरमा  ३४९ जनाले  दरखास्त फारम भरेका छन्। 
नेपाल प्रहरीले प्रतिनिधि सभा सदस्य र प्रदेश सभा सदस्य निर्वाचनको सुरक्षाका लागि म्यादी प्रहरीको लागि आजबाट असोज ६ गतेसम्म सार्वजनिक बिदाको दिन समेत दरखास्त बुझाउने गरी कार्य तालिका सार्वजनिक गरेको थियो। 
सोही अनुसार आज बिहीबार मात्र ३४९ जनाले फारम गरेको मकवानपुरका प्रहरी प्रवक्ता डिएसपी टेक बहादुर कार्कीले बताएका छन्। 
म्यादी प्रहरीलाई फारम भर्ने ३४९ जनामा  २२७ पुरुष र १२२ महिला रहेको जनाइएको छ। 
आवेदनका लागि पुरुषको हकमा घटीमा उचाइ ५ फिट २ इन्च, छाती ३१ दशमलब ३३ इन्च, तौल ५० किलोग्राम र महिलाको हकमा घटीमा उचाइ ५ फिट, तौल ४२ किलोग्राम भएको हुनुपर्नेछ । 
म्यादी प्रहरी छनोटमा स्थानीय तह वा प्रतिनिधि सभा सदस्य र प्रदेश सभा सदस्य निर्वाचन २०७४ वा स्थानीय तह निर्वाचन २०७९ को निर्वाचनमा म्यादी प्रहरीका रूपमा भर्ना भई सन्तोषजनक काम गरेका व्यक्तिहरू पहिलो प्राथमिकता दिने प्रहरीले जनाएको छ । 
नेपाली सेना, नेपाल प्रहरी र सशस्त्र प्रहरी बल, नेपालमा कार्यरत रही निवृत्तिभरण वा उपदान प्राप्त पूर्व सुरक्षाकर्मीहरू तथा पूर्व वन रक्षकहरू, सुरक्षा निकायमा विभिन्न पदमा भदौ महिनासम्म भर्नाका लागि आवेदन दिई शारीरिक तन्दुरुस्ती र स्वास्थ्य परीक्षणमा उत्तीर्ण भई प्रवेश पत्रको प्रतिलिपि पेश गर्ने व्यक्तिहरू र विदेशी मित्र राष्ट्रका सुरक्षा निकायहरूमा काम गरी सेवा निवृत्त नेपाली नागरिकलाई प्राथमिकता दिइने प्रहरीले जनाएको छ । आवेदक दरखास्त फारम दर्ता गर्ने अन्तिम मितिसम्म १८ वर्ष पूरा भई ५४ वर्ष ननाघेको हुनुपर्नेछ । त्यस्तै नेपाली नागरिक हुनुपर्ने, साधारण लेखपढ गर्न जान्ने, नैतिक पतन देखिने फौजदारी अभियोगमा सजाय नपाएको, राजनीतिक दलको सदस्य नरहेको, शारीरिक तथा मानसिक रूपले स्वस्थ रहेको, आतङ्ककारी सङ्गठनको सदस्य नरहेको, आँखा माइनस दुई वा प्लस दुई भन्दा बढी कमजोर नभएको हुनुपर्नेछ । आवेदन फारम ७७ वटै जिल्ला प्रहरी कार्यालयमा उपलब्ध हुने जनाइएको छ।