हेटौंडा–३ का दुई सामुदायिक विद्यालयमा नि:शुल्क अंग्रेजी माध्यममा पढाइ

९असोज,हेटौंडा । हेटौंडा–३ मा  रहेका दुईवटा सामुदायिक विद्यालयहरुले अंग्रेजी माध्यममा नि:शुल्क रुपमा पढाउन सुरु गरेको छ। 

हेटौंडा वडा नम्बर-३ मा रहेका बाल उज्जवल मावि र बसामाडीमा रहेको महेन्द्र किरण माविमा कक्षा १ बाट उक्त अभियान सुरुवात गरिएको हो । 
३ नम्बर वडा शिक्षा समन्वय समितिले नि:शुल्करुपमा अंग्रेजी माध्यममा शिक्षा प्रदान गर्ने व्यवस्था मिलाएसँगै आइतबारबाट सामुदायिक विद्यालयहरुले पठनपाठन सुरु गरेको हो। अभियानको आइतबार बिहान हेटौंडा उपमहानगरपालिकाका उपमेयर राजेश बानियाँले  उदघाटन गरेका छन् । 
शिक्षा समन्वय समितिले हेटौंडा उपमहानगरपालिका, उपमेयर राजेश बानियाँ र युनिलिभर नेपाल लिमिटेडसँगको सहकार्यमा पाँच वर्षभित्र कक्षा ५ सम्म नि:शुल्करुपमा अंग्रेजी माध्यमबाट शिक्षा दिने व्यवस्था गर्ने जनाएको छ । समितिले कक्षा १ मा अध्ययनरत् ७० जना विद्यार्थीलाई एकवर्षका लागि आवश्यक पर्ने किताबसहित सम्पूर्ण स्टेशनरी सामग्री, ड्रेस , ट्रयाकसुट र व्यागको व्यवस्था गरेको छ । आगामी वर्षबाट २ कक्षासम्म नि:शुल्क शिक्षाको व्यवस्था गर्ने गरी तयारी गरेको समिति सदस्य टेकनाथ शिवाकोटीले बताए।
वडा अध्यक्ष ढलकबहादुर थापाले अंग्रेजी माध्यमबाट नि:शुल्करुपमा शिक्षा प्रदान गर्ने गरी तयारी गरिरहेको र त्यसका लागि दाताको खोजी कार्य भइरहेको बताए । अभियानको उदघाटन समारोहमा वडाका जनप्रतिनिधि,विद्यालय व्यवस्थापन समितिका अध्यक्ष शिक्षक, अभिभावक तथा विद्यार्थीहरुको सहभागिता रहेको थियो।