कांग्रेस हराउन लाग्नेहरु घण्टी बोकेर हिँडेको बानियाँको आरोप

file photo

१४ असोज, हेटौंडा । नेपाली कांग्रेस बागमती प्रदेश सभापति ईन्द्रबहादुर बानियाँले यसअघिको निर्वाचनमा आफ्नै पार्टीका उम्मेदवारलाई हराउन लागिपरेकाहरु अहिले घण्टी बोकेर हिँड्न थालेको बताएका छन् । 
बडा दशैं, तिहार तथा छठको अवसरमा कांग्रेस मकवानपुर क्षेत्र नम्बर २ को प्रदेशसभा ‘ख’ समितिले आयोजना गरेको शुभकामना आदानप्रदान कार्यक्रमलाई सम्बोधन गर्दै उनले निर्वाचन पछि घन्टी मन्दिरमै थन्किने र अन्त कहिँकतै नभेटिने दावी गरे ।
 ‘कांग्रेसको जित कांग्रेसले नै देख्न नचाहने रोगले सताउँदै आएको छ । अब कांग्रेसभित्र शुद्धिकरण र सुदृढीकरण जरुरी छ’, बानियाँले भने, । स्थानीय चुनावमा गठबन्धन गर्न नदिने र आफ्नै उम्मेदवार हराउन लाग्ने अनि अघिल्ला चुनावहरुमा आफ्नै उम्मेदवारलाई असहयोग गरेकाहरु अहिले घन्टी बोकेर हिँडेको सभापति बानियाँले बताए । 
आफू केन्द्रीत राजनीति गर्नु गलत हुने भन्दै उनले पदको लागि नभई पद्दतिको लागि राजनीति गर्नुपर्ने सुझाव दिए । शान्ति प्रक्रियाको जगमा गठबन्धन भएको उल्लेख गर्दै उनले संघीय लोकतान्त्रिक गणतन्त्रलाई बलियो नाउन गठबन्धन आवश्यक रहेको दावी गरे । 
कांग्रेसबाट जितेका जनप्रतिनिधिले खराब काम गरे कारबाही गर्ने उनको चेतावनी थियो । क्षेत्रीय सभापति रञ्जन कालाखेतीको अध्यक्षतामा भएको कार्यक्रममा जिल्ला सचिव भिमसेन महत, महासमिति सदस्य निर्मला हिमडुङ, चित्रबहादुर थापा, जिल्ला सदस्य बच्चुमाया नेगी, संघीय सचिव सन्तोष थापा, महिला नेतृ कमला मैनाली, मनहरी गाउँपालिका सभापति प्रकाश बर्तौला, लगायतले शुभकामना मन्तव्य व्यक्त गरेका थिए ।