अल्ट्रासाउन्ड सेवामा मनपरी भएको भन्दै काउन्सिलद्वारा ३ बुँदे निर्देशन 

१५ असोज, हेटौंडा । नेपाल मेडिकल काउन्सिलले अल्ट्रासाउण्ड सेवामा मनपरी भएको भन्दै यसको नियमन गर्न ३ बुँदे निर्देशन जारी गरेको छ । 
काउन्सिलले देशका विभिन्न स्वास्थ्य संस्थाहरूमा आवश्यक न्यूनतम योग्यता बिना अनाधिकृत रुपमा रेडियोलोजी सेवा अन्तर्गतको अल्ट्रासाउण्ड सेवा प्रवाह भैरहेको गुनासो आएपछि तीन बुँदे निर्देशन जारी गरेको हो । 
स्वास्थ्य संस्था स्थापना तथा स्तरोन्नति मापदण्ड सम्बन्धी निर्देशिका २०७० को दफा २३ मा उल्लेख भए बमोजिम एक्स–रे, सीटी स्क्यान, एमआरआई, अल्ट्रासाउण्ड, लगायतका रेडियोलोजी सेवा तथा सो को रिपोर्टिङ रेडियोलोजिष्टहरूले मात्र गर्न पाउने व्यवस्था रहेको छ । साही अनुसार गर्न काउन्सिलले निर्देशन जारी गरेको छ । 
यस्तै स्वास्थ्य संस्था स्थापना, सञ्चालन तथा स्तरोन्नति मापदण्ड सम्बन्धी निर्देशिका, २०७० को दफा २३ को उपदफा (२) (ङ) मा गरिएको व्यवस्थामा आधारित रहेर आफ्नो क्षेत्रमा मात्र प्रयोगमा ल्याउने गरी मान्यता प्राप्त संस्थाबाट कम्तीमा ३ महिनाको अल्ट्रासाउण्ड तालिम प्राप्त नेपाल मेडिकल काउन्सिलको दर्तावाल स्त्री तथा प्रसूति रोग विशेषज्ञ तथा जनरल प्राक्टिस÷इमरजेन्सी मेडिसिन विशेषज्ञले अल्ट्रासाउण्डको प्रयोग गर्न पाउने व्यवस्था रहेको छ । 
यो व्यवस्थाको उलङ्घन नगर्न समेत काउन्सिलले निर्देशन दिएको छ ।  काउन्सिलले अल्ट्रासाउण्ड तालिमको आधिकारिकता तथा प्रमाणको जाँचबुझ हुनसक्ने समेत बताएको छ । काउन्सिलले  ऐन, नियम तथा व्यवस्थापनका विपरित अनाधिकृत रूपमा अल्ट्रासाउण्ड गरेको वा गराईएको पाइएमा प्रचलित कानून बमोजिम कारबाही गरिने समेत बताएको छ ।