दूध विक्रीबाट मकवानपुरमा एक वर्षमा ८४ करोड शहरको पुँजी गाउँ भित्रियो

file photo

२७ असोज, हेटौंडा । मकवानपुर जिल्लामा सहकारीबाट दूध विक्री गरी एक वर्षमा ८४ करोड रुपैयाँ शहरको पुँजी गाउँ भित्रिएको मकवानपुर जिल्ला दुग्ध उत्पादक सहकारी संघले जनाएको छ । 
गत आर्थिक वर्षमा दूध विक्री गरी मकवानपुरमा ८४ करोड ९७ लाख १८ हजार ९० रुपैयाँ शहरको पुँजी गाउँ भित्रिएको हो । मकवानपुर जिल्ला दुग्ध उत्पादक सहकारी संघ लिमिटेडको २९ औँ वार्षिक प्रतिवेदन अनुसार संघ चिस्यान केन्द्र चौकीटोलमा ९ लाख ७१ हजार लिटर र संस्थाबाट सिधै उद्योग गएको १ करोड २८ लाख ७३ हजार लिटर दूध खरिद भएको छ । 
आर्थिक वर्ष २०७७÷७८ को तुलनामा गत आर्थिक वर्षमा १७ लाख ४२ हजार ९४७ लिटर दूध खरिद भएको संघको प्रतिवेदनमा उल्लेख छ । संघबाट प्राप्त विभिन्न उद्योगलाई ५ लाख ८३ हजार ८१६ लिटर दूध विक्री गरी ३ करोड ७६ लाख ५७ हजार रुपैयाँ आर्जन गरेको छ । 
यसैगरी संस्थाबाट सिधै उद्योगमा १ करोड २८ लाख ७३ हजार ३२५ लिटर दूध विक्रीबाट ७८ करोड ८२ लाख ७९ हजार रुपैयाँ, स्थानीयलाई दूध ३ लाख ८८ हजार २ सय ३७ लिटर विक्रीबाट २ करोड ८३ लाख ८ हजार ८७८ रुपैयाँ आर्जन गरेको छ । 
५३ वटा प्रारम्भिक दुग्ध संस्था आवद्ध रहेको संघको खुद नाफा बचत १७ लाख ७ हजार रुपैयाँ रहेको छ । मकवानपुरमा दुग्ध चिस्यान केन्द्र ४० वटा, मिल्क एनालाइजर सञ्चालित संस्थाहरु ४३ वटा रहेको छ भने दुग्ध भण्डारण क्षमता ७० हजार लिटर रहेको संघका व्यवस्थापक कुमारमणि दाहालले जानकारी दिए ।