कोरोना बीमाको दावी भुक्तानी यसै हप्ताभित्र गरिने 

२० कार्तिक, हेटौंडा । कोरोना बीमाको बाँकी रहेको दावी भुक्तानी मध्ये १ अर्ब ८१ करोड ८४ लाख रूपैयाँ बराबरको भुक्तानी यसै हप्ताभित्र गरिने बीमा समितिले जनाएको छ । कोरोना बीमा भुक्तानी रोकेको करिब डेढ वर्षपछि बीमा कम्पनीहरूले भुक्तानी सुरु गर्न लागेका हुन् । 
सरकारले कोरोना बीमा वापतको १ अर्ब रूपैयाँ बीमा समितिलाई दिएपछि समितिले ८१ करोड ८४ लाख रूपैयाँको जगेडा गरेर बिमितलाई पहिलो चरणमा केही दावी भुक्तानी गर्न लागेको हो । बीमा समितिका अनुसार कुल १० अर्ब ५२ करोड रूपैयाँको बीमा रकम दावी भुक्तानी हुँन बाँकी छ । 
सो रकम मध्येको एक अर्ब ८१ करोड ८४ लाख रूपैयाँ बराबरको दावी भुक्तानी पहिलो चरणमा वितरण गर्न लागिएको बीमा समितिका कार्यकारी निर्देशक राजुरमण पौडेलले जानकारी दिए । पौडेलले वितरण गर्न लागिएको रमक बिमक संघको खातामा जम्मा भइसकेको बताए । 
समितिका अनुसार पहिले दावी गरेको बिमित भुक्तानिको प्राथमिकतामा पर्ने छ । बीमा समितिको तथ्याङ्कअनुसार १ लाख ११ हजार ८ सय ९९ वटा बिमितको दावी भुक्तानी भएको छैन । 
बीमा कम्पनीहरूमा १५ अर्ब ३५ करोड ६८ लाख रूपैयाँ बराबरको दाबी परेको थियो । जसमध्ये हालसम्म चार अर्ब ८३ लाख ३५ लाख रुपैयाँ मात्रै भुक्तानी भएको छ  ।