प्रत्यक्षतर्फको मतपत्र मकवानपुर आइपुग्यो

२४ कार्तिक, हेटौंडा । आगामी मङ्सीर ४ गते हुने प्रतिनिधि सभा र र प्रदेश सभा सदस्य निर्वाचनअन्तर्गत मकवानपुर जिल्लाको लागी आवश्यक पर्ने प्रत्यक्ष निर्वाचन प्रणालीतर्फको मतपत्र हेटौंडा आइपुगेको छ । 
निर्वाचन आयोगले पठाएको मतपत्र जिल्लाको दुईवटै निर्वाचन क्षेत्रमा आइपुगेको मकवानपुरका मुख्य निर्वाचन अधिकृत ऋषिराम निरौलाले जानकारी दिए । उनका अनुसार प्रत्यक्ष निर्वाचन प्रणालीतर्फ जिल्लामा तीन लाख ३२ हजार थान मतपत्र आइपुगेको र आवस्यक प्रकृया पुरा गरि निर्वाचन क्षेत्र अनुसार भण्डारण समेत गरिएको छ । 
मकवानपुर निर्वाचन क्षेत्र नं. १ का निर्वाचन अधिकृत समेत रहेका मुख्य निर्वाचन अधिकृत निरौलाले क्षेत्र नं १ मा एक लाख ६६ हजार मतपत्र आइपुगेको जानकारी दिए । उनका अनुसार यस निर्वाचन क्षत्रमा कुल १ लाख पचास हजार एकसय ५५ जना मतदाता रहेका छन् । यसैगरी अधिकृत निरौलले निर्वाचन क्षेत्र नम्बर १ को (क) का लागी ८६ हजार र (ख) का लागी ८० हजार मतपत्र विभाजन गरि तयारी अवस्थामा राखिएको पनि जानकारी दिए ।
मकवानपुर क्षेत्र नम्बर १ को प्रदेश सभा (क) मा ७७ हजार नौसय ८९ जना र प्रदेश सभा (ख) मा ७२ हजार एकसय ६६ जना मतदाता रहेका छन् । मकवानपुर निर्वाचन क्षेत्र नम्बर २ मा १ लाख ६० हजार पाँचसय ७८ मतदाताका लागि एक लाख ६६ हजार थान मतपत्र प्राप्त भएको निर्वाचन अधिकृत मुकुन्दहरी पौडेलले जानकारी दिए । उनका अनुसार निर्वाचन क्षेत्र नं. २ को प्रदेशसभा (क) मा ८३ हजार ९९ जना र प्रदेशसभा (ख) मा ७७ हजार चारसय ७९ मतदाता रहेका छन् । 
यसअघि प्रतिनिधि सभा र प्रदेश सभा निर्वाचन अन्र्तगत समानुपातिकका लागी भने असोज ३० गते नै मतपत्र आइसकेको छ । कूल ३ लाख सात ३७ जना मतदाता रहेको मकवानपुरमा तीन सय ६४ वटा मतदान केन्द्र तोकिएको छ ।