देशलाई निकास र मकवानपुरको विकास गर्न आएँः डिना

२८ कार्तिक, हेटौंडा । सत्तारुढ गठबन्धनको तर्फबाट मकवानपुर क्षेत्र नम्बर १ को प्रतिनिधिसभा सदस्यका उम्मेदवार नेपाली कांग्रेसका नेता महालक्ष्मी उपाध्याय ‘डिना’ले देशलाई निकास र मकवानपुर जिल्लाको विकासका लागि प्रत्यक्षतर्फ उम्मेदवार हुन आएको बताएकी छिन् । 
चुनावी अभियानको क्रममा सोमबार बकैया गाउँपालिका–९ शिखरपुरमा भएको चुनावीसभामा उनले यस क्षेत्रमा गर्व गर्न लायकको विकासको काम गरेर छाड्ने प्रतिबद्धता जनाइन् । आफू कुनै लाभ पाउने अभिलाषाले यो चुनावमा उम्मेदवार हुन नआएको उनले बताइन् । 
‘देशलाइ निकास चाहिएको छ, यो क्षेत्र तथा मकवानपुरलाई विकास चाहिएको छ । मेरो एउटै उद्देश्य जनताको माझमा रहेर यहाँहरुको सुखदुःखमा साथै रहने र मिलेर जिल्लाको विकास गर्ने नै हो ।’ उन यस क्षेत्रमा शिक्षा, स्वास्थ्य, रोजगारी, कृषि, पुल–पुलेसा जस्ता जनताको दैनिक जीवनसंग सम्बन्धित विषयमा योजनाबद्ध काम गर्ने प्रतिबद्धता जनाइन् । 
यसका लागि केन्द्रदेखि प्रदेश सरकारमा गठबन्धनको जित सुनिश्चित हुनुपर्ने र त्यो सुनिश्चितताका लागि जनताले मतदान गर्नुपर्ने उनको भनाई थियो । आफूले सहजै पाएको समानुपातिकतर्फको १ नम्बर सांसद् पद छोडेर जिल्लाको विकास र जनताको सुखदुःखमा साथै रहन प्रत्यक्षमा आएको जानकारी दिँदै उनले एक पटक विजयी गराइदिन अनुरोध गरिन् ।