मत जोगाउनुस्, बाँकी जिम्मेवारी मेरोः छिन्तु

२८ कार्तिक, हेटौंडा । गठबन्धनको तर्फबाट मकवानपुरको क्षेत्र नम्बर १ को प्रदेशसभा ‘क’ का उम्मेदवार प्रेमबहादुर पुलामी ‘छिन्तु’ले गठबन्धनको मत जोगाउन मतदातालाई आग्रह गरेका छन् । 
शिखरपुरमा भएको चुनावी सभामा उनले जनताले मत जोगाएर गठबन्धनका उम्मेदवारलाई विजयी गराएमा यस क्षेत्रलाई विकास र समृद्ध बनाउने जिम्मेवारी आफ्नो रहेको बताए । अघिल्लो पटक जितेर आफूले सकेको विकास गरेको उल्लेख गर्दै उनले यसपटक बाँकी रहेका योजना पूरा गर्न आएको बताए ।
‘यसपटक केही अधुरा योजना पूरा गर्ने योजना सहित फेरि आएको छु, गठबन्धनको मत संरक्षण गरिदिनुस् बाँकी केके गर्नुपर्ने, कहाँ कहाँ विकास गर्नुपर्ने त्यो सबै जिम्मेवारी हाम्रो हो’, उनले भने । छिन्तुले यस क्षेत्रमा व्याप्त रहेको लालपुर्जाको समस्यालाई गठबन्धन सरकारले छिट्टै निकास दिएर सबैको हातहातमा लालपुर्जा थमाइदिने वाचा गरे । अरु जस्तो चुनावव जितेर गएसी भाग्ने स्वभाव आफूमा नरहेको उल्लेख गर्दै उनले एक मिनेटको समय पाएपनि त्यो जनताकै लागि खर्चिने दावी गरे । 
गठबन्धनका प्रचारप्रसार संयोजक ठूलीमाया मोक्तानको अध्यक्षतामा भएको कार्यक्रममा नेकपा माओवादी केन्द्र मकवानपुर जिल्ला संयोजक सर्केश घलान, माओवादी बागमती प्रदेश सदस्य जीवन गोले र लक्ष्मी पाख्रिन, गठबन्धनका क्षेत्र नम्बर १ प्रचारप्रसार संयोजक दामोदर खनाल, वाइसीएल नेपालका केन्द्रय सचिव सुमन पाख्रिन, माओवादीका बागमती प्रदेश सदस्य लक्ष्मी माझी लगायतको आतिथ्यता थियो । 
यस्तै बकैया ५ कर्मचुलीमा आयोजना भएको टोलसभामा नेकपा एमाले परित्याग गरी ६ जना नेकपा माओवादी केन्द्रमा प्रवेश गरेका थिए ।