मकवानपुरमा शान्तिपूर्ण वातावरणमा मतदान चल्दै

४ मंसिर, हेटौंडा ।  मंसिर ४ गते आइतबार बिहान ७ बजेबाट सुरु भएको मतदान प्रकृया मकवानपुरमा शान्त वातावरणमा चलिरहेको छ । प्रतिनिधि सभा र प्रदेश सभा निर्वाचनमा मतदान गर्न मतदाताहरु बिहानैदेखि मतदान स्थलहरुमा लामबद्ध भएर मतदानका लागी बसेका थिए ।
मकवानपुरका सबै मतदान केन्द्रहरुमा तोकिएको समय विहान ७ बजेबाटै मतदान सुरु भएको मकवानपुरका मुख्य निर्वाचन अधिकृत ऋषिराम निरौलाले जानकारी दिएका छन् ।
‘सबै मतदान केन्द्रहरुमा मतदाताको उपस्थिति उत्साहजकन रहेको खबर छ । अहिलेसम्म मकवानपुरमा कुनैपनि मतदान केन्द्रमा अप्रिय घटना भएको छैन । सबै ठाउँमा शान्त वातावरणमा मतदान भइरहेको छ ।’ अधिकृत निरौलाले बताए ।
मकवानपुरमा प्रतिनिधि तथा प्रदेशसभा निर्वाचनमा ३ लाख ७३३ जना मतदाताले मतदान गर्दैछन् । २ वटा प्रतिनिधि सभा र ४ प्रदेशसभा निर्वाचन क्षेत्र रहेको मकवानपुरमा कुल ३ लाख ७ सय ३३ जना मतदाता रहेका छन् ।
मकवानपुर क्षेत्र नम्बर १ मा एकलाख ५० हजार एकसय ५५ जना मतदाता रहेका छन् । जसमध्ये ७४ हजार ९ सय ३० जना पुरुष मतदाता रहेका छन् भने ७५ हजार दुइसय २१ जना महिला रहेका छन् । अन्य मतदाताको संख्या ४ जना रहेको छ ।
क्षेत्र नम्बर १ मा ६२ वटा मतदानस्थल र एकसय ७२ वटा मतदान केन्द्र रहेका छन् । १४ वटा राजनीतिक दलका १४ जना उम्मेदवार र दुइजना स्वतन्त्र गरी १६ जना उम्मेदवार प्रतिनिधिसभा सदस्य पदको लागि चुनावी मैदानमा रहेका छन् । १६ मध्ये एकजना मात्रै महिला उम्मेदवार रहेका छन् भने बाँकी १५ जना पुरुष उम्मेदवार छन् ।
मकवानपुर क्षेत्र नम्बर २ मा एकलाख ५० हजार ५७८ जना मतदाता रहेका छन् । जसमध्ये ७८ हजार ५ सय ९८ जना पुरुष र ७१ हजार ९ सय ७९ जना महिला मतदाता रहेका छन् । अन्य मतदाता एकजना मात्रै रहेका छन् । निर्वाचन क्षेत्र नम्वर २ मा एकसय ५ वटा मतदान स्थल र एकसय ९२ वटा मतदान केन्द्र रहेको छ । प्रतिनिधिसभा सदस्यका लागि ९ वटा राजनीतिक दलका ९ जना र स्वतन्त्रतर्फ १ जना गरी १० जना उम्मेदवार प्रतिस्पर्धामा रहेका छन् ।
मकवानपुर क्षेत्र नम्बर १ को प्रदेशसभा ‘क’ मा ७७ हजार ९ सय ८९ जना मतदाता रहेका छन् । जसमध्ये पुरुष ४० हजार एक सय ११ र महिला ३७ हजार ८ सय ७७ जना रहेका छन् । अन्यमा एकजना छन् ।
मकवानपुर क्षेत्र नम्बर १ को प्रदेशसभा ‘ख’ मा ७२ हजार एक सय ६६ मतदाता छन् । जसमध्ये पुरुष ३४ हजार ८ सय १९ जना र महिला ३७ हजार ३ सय ४४ जना रहँदा अन्य मतदाता तीनजना छन् ।
यता क्षेत्र नम्बर २ को प्रदेशसभा ‘क’ मा ८३ हजार ९९ जना मतदाता रहेका छन् । यस क्षेत्रमा पुरुष ४२ हजार ८ सय ४३ जना र महिला ४० हजार २ सय ५५ जना रहेका छन् भने अन्य एकजना छन् । क्षेत्र नम्बर २ को प्रदेशसभा ‘ख’ मा ६७ हजार ४ सय ७९ जना मतदाता रहेका छन् । जसमध्ये पुरुष ३५ हजार ७ सय ५५ जना र महिला ३१ हजार ७ सय २४ जना रहेका छन् ।