बागमती प्रदेशको मुख्यमन्त्रीमा मेरो दावेदारी रहन्छः बानियाँ

१२ मंसिर, हेटौंडा । मकवानपुर प्रदेश सभा क्षेत्र नम्बर २ (ख)बाट निर्वाचित प्रदेश सभा सदस्य इन्द्रबहादुर बानियाँले बागमती प्रदेशको आगामी मुख्यमन्त्रीमा आफ्नो दाबेदारी रहेको बताएका छन् । 
मुख्य निर्वाचन अधिकृतको कार्यालय मकवानपुरले आयोजना गरेको नवनिर्वाचित सांसदहरूलाई प्रमाणपत्र वितरण गर्ने कार्यक्रमपछि पत्रकारहरूसँग कुरा गर्दै बानियाँले यस्तो बताएका हुन् ।
कांग्रेस बागमती प्रदेश सभापतिसमेत रहेका बानियाँले प्रदेशमा कांग्रेस ठूलो पार्टी बन्ने र प्रदेश सरकारको नेतृत्व गर्ने दाबी गरे । उनले कांग्रेस बागमती प्रदेशको सभापतिको हैसियतले संसदीय दलको नेता र प्रदेश सरकारको मुख्यमन्त्रीमा आफ्नो दाबी स्वाभाविक भएको बताए ।
बागमती प्रदेशमा कांग्रेस ठूलो दल बन्ने दावी गर्दै बानियाँले ठूलो दलको प्रदेश सभा सभापति भएकोले आफ्नो संसदीय दलको नेतामा समेत दावी रहेको बानियाँले बताए । उनले विगतमा प्रदेशमा सरकार फेरिने वेलामा भएको सहमतिअनुसार पनि आफु बागमती प्रदेशको मुख्यमन्त्रीको दावेदार भएको उल्लेख गरे ।
प्रदेश सदस्य बानियाँले विगतमा गठबन्धनले बागमती प्रदेशमा सरकार बनाउँदा भएको सहमतीका आधारमा पनि आफु बागमती प्रदेशको पहिलो र एकमात्र मुख्यमन्त्रीको दावेदार रहेको दावी गरे । उनले बागमती प्रदेशमा पार्टीभित्र सहमतिमै आफू संसदीय दलको नेता बन्ने पनि बताए ।