सुकुम्बासीलाई यथाशीघ्र लालपूर्जा वितरण गर्न राज्यमन्त्री प्रजाको आग्रह

१५ मंसिर, हेटौंडा । बागमती प्रदेशका भौतिक पूर्वाधार विकास राज्यमन्त्री सन्तबहादुर प्रजाले मनहरी गाउँपालिका ६ र ७ मा बसोबास गर्दै आएका विस्थापितहरुलाई यथाशीघ्र लालपूर्जा वितरण गर्न आग्रह गरेका छन् ।
राज्यमन्त्री प्रजाले मनहरी गाउँपालिकाको वडा नम्बर ६ र ७ को जोगीताल, खयरघारी, बिजौना, निर्मलबस्ती, लामाबस्ती, डिपाट, रमन्टार, कत्ले खोला क्षेत्रमा बसोबास गर्दै आएका भूमिहीनलाई तत्काल लालपूर्जा वितरणको प्रक्रिया सुरु गर्न आग्रह गरेका हुन् ।
बिहीबार भूमि सम्बन्धी समस्या समाधान आयोग मकवानपुरलाई पत्र लेख्दै राज्यमन्त्री प्रजाले २०५९ सालको बाढी पहिरोमा राक्सिराङ र कैलाश गाउँपालिकाबाट विस्थापित भई आएका र अन्यत्रबाट विस्थापित भई आएकाहरुले लामो समयदेखी जग्गाको भोगचलन गर्दै आएपनि लालपूर्जा नपाएको भन्दै उनीहरुको समस्याको सम्बोधन हुनुपर्ने पत्रमा उल्लेख गरेका छन् ।
‘लामो समयदेखि जग्गाको भोगचलन गर्दै आइए लालपूर्जा नपाएको भन्दै स्थानीयबाट बारम्बार गुनासो आएकाले पर्सा राष्ट्रिय निकुञ्ज, डिभिजन वन कार्यलय र मनहरी गाउँपालिकासँग समन्वय गरी जतिसक्दो छिटोभूमिहीनलाई लालपूर्जा वितरणको काम अघि बढाइदिनुहुन अनुरोध छ ।’ राज्यमन्त्री प्रजाको पत्रमा भनिएको छ ।
मनहरीको ६ र ७ का विभिन्न बस्तीमा करिब तीन हजार पाँचसय परिवार भूमिहीन सुकुम्बासीहरु बसोबास गर्दै आएका छन् । मनहरी गाउँपालिकाले यसअघि भूमिहीनको लगत संकलनसमेत गरिसकेको छ ।