नेपाल जेसिसको राष्ट्रिय उपाध्यक्षमा अधिकारीको  उम्मेदवारी

१८ मंसिर, हेटौंडा । बसामाडी जेसीजका पूर्व अध्यक्ष सरोज अधिकारीले नेपाल जेसीजको राष्ट्रिय उपाध्यक्ष पदमा उम्मेदवारी दिने घोषणा गरेका छन् । बसामाडी जेसीजको बर्ष सन् २०१९ का अध्यक्ष रहेका उनले २०२३ का लागि राष्ट्रिय उपाध्यक्ष पदमा उम्मेदवारी दिने बताएका हुन् ।
यही पुष ७ गतेबाट छिमेकी जिल्ला पर्साको बीरगञ्जमा हुने नेपाल जेसीजको राष्ट्रिय महाधिवेशनको लागि उपाध्यक्ष पदमा उम्मेदवारी दिएको उनले जानकारी दिए । हाल नेपाल जेसीजको नोम इडिटर पदमा रहेका उनले आन्तरिक भेटघाट तथा चुनावी अभियानलाई तीव्रता दिएका छन् । 
बीरगञ्ज जेसीजको आतिथ्यतामा ४९ औं राष्ट्रिय महाधिवेशन हुँदैछ । अघिल्लो पटक पनि राष्ट्रिय उपाध्यक्षको उम्मेदवार रहेका अधिकारी झिनो मतान्तरले पराजित भएका थिए । यसपटक चुनावी अभियानलाई तीव्रता दिएको बताउँदै अधिकारीले सबैबाट सकारात्मक सहयोग पाइरहेकोले आफुले जित्नेमा ढुक्क रहेको दावी गरे ।
नेपाल जेसीज र शाखाको बीचमा समन्वय गरी युवाहरुको नेतृत्व र व्यक्तित्व विकाससँगै जेसीजमा युवाहरुको सक्रियता बढाउनका लागि आफ्नो उम्मेदवारी भएको उनले बताए । 
नेपाल जेसीजको नेतृत्वका लागि अध्यक्षमा ६ जना, कार्यकारिणी उपाध्यक्ष पदमा १० जना र उपाध्यक्ष पदमा १९ जनाले उम्मेदवारी दिएका छन् । महाधिवेशनले एक अध्यक्ष, ४ कार्यकारिणी उपाध्यक्ष र १२ जना उपाध्यक्ष निर्वाचित गर्नेछ ।