मानवसेवाका लागी सांगितीक यात्राको तयारी पुरा

२१ मंसिर, हेटौंडा । मानवसेवा आश्रमको भवन निर्माण एवम् अक्षयकोष स्थापनाका लागि भोली बिहीबार हेटौंडामा हुने मानवताका लागी सांगितीक यात्राको तयारी पुरा भएको छ ।
हेटौंडा ४ स्थित भुटनदेवी माविको मैदानमा हुने लाइभ कन्सर्टको सम्पूर्ण तयारी पूरा भएको आयोजक मानव सेवा आश्रमले जानकारी दिएको छ । सांगीतिक कार्यक्रमको पूर्व सन्ध्यामा बुधबार मानवसेवा आश्रममा नेपथ्य परिवारसंग चियापान कार्यक्रमको आयोजना गर्दै कन्सर्टका तयारीको बारेमा जानकारी गराइएको हो  ।
उक्त अवसरमा नेपथ्यका मुख्य गायक अमृत गुरुङले सामाजिक कार्यका लागि गीत गाउन पाउँदा खुसी लागेको बताएका छन् । उनले कार्यक्रममा सहभागिताका लागी हेटौंडाका नागरिकहरुलाई आग्रह गरेका थिए ।
मानवताका लागी सांगितीक यात्राको हेटौंडाका कार्यक्रम संयोजक पुरणबहादुर जोशीको अध्यक्षतामा भएको कार्यक्रममा मकवानपुरका प्रमुख जिल्ला अधिकारी राजेन्द्रदेव पाण्डे, अग्रज पत्रकार प्रताप बिष्ट, समाजसेवी देवप्रसाद श्रेष्ठ लगायतले मन्तव्य व्यक्त गरेका थिए । 
उक्त अवसरमा आश्रममा आश्रितहरुको संरक्षण र पालनपोषणका लागी सुरु गरेको अक्षयकोषमा रकम सहयोग गर्ने व्यक्ति एवं संस्थालाई सम्मान समेत गरिएको थियो । कार्यक्रममा आश्रमका केन्द्रीय अध्यक्ष रामजी अधिकारीले मानवसेवा आश्रमको केन्द्रीय कार्यालय समेत रहेको यस हेटौंडाबाटै मानवता अभियानको सुरु गरेको जानकारी दिँदै सामाजिक कार्यका लागि हुन लागेको कार्यक्रममा सहभागी हुन सर्वसाधारणलाई अनुरोध गरेका थिए ।