आयोगद्वारा प्रदेश प्रमुख शर्मा समक्ष प्रतिवेदन पेश

२ पुस,हेटौंडा । निर्वाचन आयोगले गत मंसिर ४ गते सम्पन्न बागमती प्रदेशसभाका निर्वाचित सदस्यहरूको विवरण शनिवार बागमती प्रदेश प्रमुख यादवचन्द्र शर्मा समक्ष पेश गरेको छ ।

आयोगका सचिव गोकर्णमणि दवाडीले प्रदेशसभा सदस्य निर्वाचन ऐन २०७४ दफा ६२ अनुसार प्रदेश प्रमुख शर्मा समक्ष बागमती प्रदेशसभाका लागि निर्वाचित सदस्यहरुको विवरण सहितको प्रतिवेदन पेश गरेका हुन् । 

प्रतिवेदन बुझ्दै प्रदेश प्रमुख शर्माले आयोगलाई निश्पक्ष र शान्तिपूर्ण रुपमा एकैपटक निर्वाचन सम्पन्न गर्न सफल भएको भन्दै धन्यवाद दिएका थिए । यस्तै उनले बागमती प्रदेश सभामा निर्वाचित भएका प्रदेश सदस्यहरुलाई बधाई दिदैँ जनताको अपेक्षा पुरा गर्नेगरि काम गर्ने विश्वास समेत व्यक्त गरे ।

आयोगले बुझाएको प्रतिवेदन अनुसार बागमती प्रदेशसभाका लागि प्रत्यक्षतर्फ निर्वाचित ६६ र समानुपातिकतर्फ ४४ गरी कुल ११० सदस्य निर्वाचित भएका छन् भने प्रदेशसभामा ७ वटा दलको प्रतिनिधित्व रहेको छ । यस्तै ११० जना निर्वाचित सदस्य मध्ये पुरुष ७० जना (६३ दशमलव ६३ प्रतिशत) र महिला ४० जना (३६ दशमलव ३७ प्रतिशत) निर्वाचित भएको पनि प्रतिवेदनमा उल्लेख गरिएको छ ।

यस्तै बागमती प्रदेश सभा सदस्य निर्वाचनमा पहिलो हुने निर्वाचित हुने निर्वाचन प्रणालीतर्फ ३५ र समानुपातिक निर्वाचन प्रणालीतर्फ ४० राजनीतिक दल निर्वाचनमा सहभागी भएको मध्ये प्रत्यक्षतर्फ पुरुष ५८८ र महिला ८० गरी कूल ६६८ जनाको अन्तिम उम्मेदवारी कायम भएको थियो भने समानुपातिक तर्फ कूल ७५४ जना उम्मेदवारको अन्तिम बन्द सूची कायम गरिएको थियो ।